Kthesa e papritur e presidentit amerikan pas retorikës së ashpër mbi Iranin dhe marrëveshjen bërthamore, duke shprehur gatishmërinë për të biseduar pa kushte me homologun iranian nuk ka gjetur një pritje pozitive në palën tjetër.
Ndërsa Trump deklaroi të hënën në një konferencë shtypi se ishte i gatshëm të takohej me Hasan Ruhanin, presidentin iranian, zyrtarë të Iranit kanë deklaruar dje se në vend që të kërkojë bisedime, presidenti amerikan duhet t’i ribashkohet marrëveshjes bërthamore, prej së cilës u tërhoq në mënyrë të njëanshme më herët gjatë këtij viti.
Agjencia shtetërore iraniane e lajmeve, IRNA, ka cituar zëvendëskryetarin e parlamentit, Ali Mutaharin, të ketë thënë se, “Nëse Trump-i nuk do të ishte tërhequr nga marrëveshja bërthamore dhe nuk do t’i kishte vënë sanksione Iranit, nuk do të kishte problem për negociata me Amerikën. Por negociimi me Amerikën do të ishte një poshtërim tani.”
Në një reagim të tij, një prej këshilltarëve të Ruhanit, Hamid Ebutalebi, do të shkruante në Twitter: “Ata që besojnë në dialogun si një mënyrë për zgjidhjen e mosmarrëveshjeve në shoqëritë e qytetëruara duhet [të angazhohen] ndaj instrumenteve të tij: duke respektuar kombin e madh të Iranit, duke i reduktuar qëndrimet armiqësore, dhe një kthim të SHBA-së në JCPOA [marrëveshjen bërthamore].”
Shefi i Rojeve Revolucionare ka qenë shumë më i ashpër. “Z. Trump, Irani nuk është Koreja e Veriut, dhe nuk do të japë një përgjigje pozitive për kërkesën tuaj për takim.”
“Duhet ta dini,” ka vazhduar gjenerali Aziz Xhaferi, “se kjo është një ëndërr që nuk do të [bëhet realitet] deri në fund të presidencës suaj, e madje dhe presidenti tjetër amerikan nuk do ta shohë atë të realizuar.” /tesheshi.com/
