Të shpallur fajtorë për pjesëmarrje në masakrën e ISIS-it ndaj qindra ushtarëve në vitin 2014, 36 persona janë ekzekutuar sot me varje në Irak.
Të dënuarit u varën në mëngjes në burgun Nasirije në jug të vendit, dhe mendohet të jenë të tërë shtetas irakianë. Dënimi me varje ndaj tyre u dha në shkurt të këtij viti, ndërsa presidenti irakian, Fuad Masum, e la në fuqi vendimin një javë më parë.
Pasi e mori Tikritin në vitin 2014, ISIS-i kapi rreth 1.700 ushtarë që po përpiqeshin të iknin nga kampi Speicher, një ish-bazë amerikane jashtë qytetit. Pamjet filmike të publikuara më vonë tregonin vrasjen masive të qindra studentëve ushtarakë dhe të punonjësve të sigurisë.
Masakra e Speicher-it nxiti mobilizimin e milicisë për të luftuar ISIS-in. Ndërkaq, forcat irakiane arrestuan dhjetëra njerëz që kishin lidhje me masakrën pasi e rimorën Tikritin një vit më pas me ndihmën e sulmeve ajrore të udhëhequra nga SHBA-të. /tesheshi.com/
