Një nëpunës i Konsullatës turke në Erbil ka humbur jetën si pasojë e një sulmi të armatosur në një restorant në qytetin verior irakian, ndërkohë që i vdekur ka mbetur edhe një shtetas vendas.
Diplomatët e konsullatës turke në Erbil janë sulmuar në restorantin ku kishin shkuar për të drekuar.
“Një diplomat turk dhe një shtetas irakian humbën jetën në sulmin e armatosur sot në një restorant në Erbil, kurse një shtetas tjetër është plagosur”, tha policia vendase në një deklaratë.
Pronari i restorantit më herët deklaroi për median lokale se agresori me rroba civile dhe me dy armë në duar ka hapur zjarr drejtpërdrejt në stafin e konsullatës pas hyrjes në lokal.
Presidenti Erdogan reagoi duke thënë se ishte një sulm i neveritshëm.
“Dënoj sulmin e neveritshëm ndaj stafit tonë të konsullatës. Lus Allahun ta mëshirojë njeriun tonë të rënë dëshmor. Ne jemi duke i vazhduar iniciativat me autoritetet irakiane dhe zyrtarët lokale për gjetjen sa më parë të autorëve të sulmit”, ka theksiar presidenti turk. /tesheshi.com/
