Iraku është përballur prej kohësh me problemin e tregtisë së paligjshme të kafshëve të egra.
Dhe në këtë realitet, një burrë në Irak u sulmua për vdekje nga një luan vetëm disa ditë pasi e solli kafshën në shtëpi me shpresën për ta zbutur në kopshtin e tij.
Viktima, 50-vjeçari Aqil Fakhr al-Din, njihej në vend për mbajtjen e luanëve dhe kafshëve të tjera të egra në pronën e tij për vite me radhë, sipas policisë.
“Sot, në një kopsht në qytetin Kufa në provincën Najaf, një qytetar u sulmua nga një luan në kopshtin e tij”, tha zëdhënësi i policisë lokale, Mufid Tahir. “Luani shqeu një pjesë të madhe të trupit të burrit dhe, meqenëse nuk pranoi të linte mbetjet, ne u detyruam ta qëllonim dhe ta vrisnim”, shtoi ai.
Al-Din u dërgua menjëherë në spital, por nuk mbijetoi për shkak të plagëve të rënda.
Një pamje e një luani të ngordhur të shtrirë në një kopsht është bërë virale në mediat sociale, duke shkaktuar zemërim që një burrë mund të mbajë një kafshë të tillë në kopshtin e tij dhe duke ngritur pyetje në lidhje me rregulloret e dobëta të Irakut mbi pronësinë private të kafshëve ekzotike.
Iraku është përballur prej kohësh me një problem me tregtinë e paligjshme të kafshëve të egra, të nxitur nga kërkesa e fortë dhe vitet e zbatimit të dobët të ligjit, raporton The Sun.
Në mungesë të rregulloreve efektive, gjuetarët dhe kontrabandistët vazhdojnë të kapin dhe tregtojnë specie të rralla.
Në zonat malore dhe të largëta të rajonit të Kurdistanit, kontrabandistët synojnë gjithashtu një gamë të gjerë speciesh, duke përfshirë zogj të egër, dhelpra dhe zvarranikë. Shumë nga këto kafshë shiten në tregjet lokale ose kontrabandohen përtej kufijve te blerës më të pasur në vendet fqinje dhe shiten në tregun e zi.
Në mungesë të rregullave më të rrepta, incidentet që përfshijnë kafshët shtëpiake ekzotike, duke përfshirë arratisjet dhe sulmet, mbeten një kërcënim i madh. /tesheshi.com/
