Komiteti Olimpik Ndërkombëtar (IOC) ka refuzuar të njohë zgjedhjen e Viktor Lukashenkos, djalit të presidentit bjellorus Aleksandër Lukashenko, si kreu i Komitetit Olimpik të vendit.
Duke qenë se babai dhe djali i Lukashenkos tashmë janë ndaluar të marrin pjesë në Lojërat Olimpike, si pjesë e masave të përkohshme të marra nga IOC në dhjetor, organi olimpik tha se nuk do të njihte zgjedhjet e Viktor Lukashenkos në 26 shkurt si kreu i Komitetit Olimpik Kombëtar.
Viktor Lukashenko ka pasuar babanë e tij Aleksandrin si kreun e Komitetit Olimpik Bjellorus.
“IOC gjithashtu vuri në dukje me shumë zhgënjim se Komiteti Olimpik Bjellorus nuk i mbrojti siç duhet atletët bjellorusë nga diskriminimi politik,” tha IOC në një deklaratë.
Në dhjetor, IOC ndaloi Aleksandër Lukashenkon dhe djalin e tij Viktor që të merrnin pjesë në Lojërat Olimpike dhe i përjashtoi ata nga të gjitha aktivitetet e tjera të IOC, ndërsa në të njëjtën kohë pezulloi çdo pagesë në Komitetin Olimpik Kombëtar, përveç atyre për të mbështetur atletët në kualifikimin për Lojërat Olimpike.
Alexander Lukashenko, i cili ka drejtuar Komitetin Olimpik Bjellorus që nga viti 1997, fitoi mandatin e tij të gjashtë presidencial në gusht të vitit të kaluar, duke shkaktuar protesta të shumta dhe demonstrata të opozitës. /tesheshi.com/
