Shtetet e Bashkuara kanë liruar një inxhinier nga Arabia Saudite, i cili ka qenë i burgosur për më shumë se 20 vjet në burgun ushtarak të Gjirit të Guantanamos, megjithëse ai kurrë nuk u akuzua për ndonjë krim pas sulmeve të 11 shtatorit 2001.
Departamenti Amerikan i Mbrojtjes tha se Ghassan Al Sharbi, 48 vjeç, u kthye në Arabinë Saudite pasi një bord shqyrtimi përcaktoi në shkurt 2022 se ndalimi i tij “nuk është më i nevojshëm për t’u mbrojtur kundër një kërcënimi të vazhdueshëm të rëndësishëm për sigurinë kombëtare të Shteteve të Bashkuara të Amerikës”.
Al Sharbi u transferua në Arabinë Saudite “në varësi të aplikimit të një grupi të plotë masash sigurie, duke përfshirë monitorimin, kufizimet e udhëtimit dhe shkëmbimin e vazhdueshëm të informacionit”, tha Pentagoni në një deklaratë.
Bordi i Rishikimit Periodik të Pentagonit vendosi në vitin 2022 se Al Sharbi nuk kishte asnjë pozitë udhëheqëse apo mbështetjeje në Al-Kaeda. U tha gjithashtu se kishte “probleme të paspecifikuara të shëndetit fizik dhe mendor”.
Lidhjet me rrëmbyesit
Shtetet e Bashkuara thonë se Al Sharbi u arratis në Pakistan pas sulmeve të 11 shtatorit dhe mori trajnime për prodhimin e bombave. Ai u arrestua atje vitin pasues, dyshohet se u torturua në paraburgim dhe më pas u dërgua në burgun e Guantanamos.
Ushtria amerikane shqyrtoi akuzat kundër Al Sharbit dhe disa të tjerëve, por i hoqi ato në vitin 2008. Megjithëse ai nuk u akuzua kurrë për ndonjë krim, atij gjithashtu iu mohua lirimi dhe Shtetet e Bashkuara vazhduan ta mbanin Al Sharbin si një luftëtar armik.
Al Sharbi fillimisht ishte në shënjestër sepse ai studioi në Universitetin Aeronautik të Arizonës dhe ndoqi shkollën e fluturimit me dy rrëmbyes të Al-Kaedës të përfshirë në sulmet e vitit 2001.
Ai është të paktën i katërti i burgosur i Guantanamos që lirohet dhe dërgohet në një vend tjetër këtë vit.
Baza e marinës amerikane në Gjirin e Guantanamos, Kubë mbante rreth 600 të burgosur në kulmin e saj në 2003. Pas transferimit të Al Sharbit, tani aty ka 31 të burgosur, duke përfshirë 17 persona që konsiderohen të përshtatshëm për transferim nëse gjendet një vend i qëndrueshëm për t’i pranuar ata, tha ministri i mbrojtjes.
Tre të burgosur të tjerë të Guantanamos kanë të drejtë për rishikim, ndërsa nëntë përballen me akuza nga komisionet ushtarake dhe dy janë dënuar sipas komisioneve të tilla.
Mbyllja e burgut
Dy vëllezër pakistanezë – Abdul, 55 vjeç dhe Mohammed Rabbani, 53 – u liruan dhe u kthyen në shtëpi muajin e kaluar pasi u mbajtën në Gjirin e Guantanamos për dy dekada.
Senatori pakistanez Mushtaq Ahmed Khan, kryetar i komitetit të të drejtave të njeriut në dhomën e lartë të parlamentit të vendit, tha se burrat ishin të pafajshëm, por SHBA i kishte burgosur për 21 vjet.
“Ndaj tyre nuk ka pasur asnjë gjykim, asnjë procedurë gjyqësore, asnjë aktakuzë. I përgëzoj për largimin e tyre. Faleminderit Senatit të Pakistanit”, shkroi ai në Tëitter në kohën e lirimit të tyre.
Vëllezërit u transferuan në paraburgimin amerikan pasi zyrtarët pakistanezë i arrestuan në Karaçi në 2002. SHBA e ka akuzuar çiftin se ka ndihmuar anëtarët e al-Kaedës me strehim dhe mbështetje të tjera logjistike të nivelit të ulët.
Organizatat e të drejtave të njeriut kanë kërkuar prej kohësh mbylljen e burgut të Guantanamos. /tesheshi.com/
