Nga Mark Brunga
A ju mbahet mend i ashtëquajturi revolucion tekniko-shkencor, ai që ishte dhe në funksion të zhvillimit të socializmit me forcat tona, ku novatorët dhe racionalizatorët qëndronin në ballë, duke u udhëhequr nga mësimet e partisë, vendimet e kongresit… ?
Ja, po u sjellim një rast dhe një njeri.
Më 22 prill të vitit 1963, në orën 18.00 fillon nga puna furra e fabrikës së çimentos në Kombinatin “Josif Pashko” të Tiranës. Këtë e mësojmë të dokumentuar në një foto të ruajtur nga inxhinieri projektues, Fadil Kërtusha, i cili i projektoi gjithashtu dhe i zbatoi në NSHRMN-në e Durrësit makineritë përkatëse të kësaj fabrike. Ishin këto vepra 5-vjeçari, siç quheshin ideologjikisht kohët e planifikuara për ndërtimin e socializmit. Durrësi dallohej për të nxjerrë kuadro fushash, nga ata që konsideroheshin heronj të sistemit, por që për talentin dhe aftësitë që kishin, madje dhe formatin intelektual, i vlejnë çdo kohe. Një ndër këta persona ishte dhe inxhinier Fadil Kërtusha. Për projektin e punuar prej tij dhe prodhimin e montimin e fabrikës së çimentos, puna e së ilës ka nisur për herë të parë sipas datës së fotos së shkrepur më më 22 prill të vitit 1963, Kërtusha është dekoruar me Çmimin e Republikës së Klasit të III-të.
Pjesa më aktive e jetës së tij kanë qënë vitet 1960-1990. Dhe gjatë këtyre viteve, pas mbarimit të studimeve si një nga studentët e parë te degës së Inxhinierisë Mekanike pranë Universitetit Shtetëror të Tiranës në fund të viteve 50-të, ai mori përsipër detyra të rënda e me përgjegjësi. Dhe kur themi me përgjegjësi, nuk kemi parasysh vetëm devocionin komunnist, por dhe investimin për të mos rrezikuar të shkoje tek “vendi i qenit” nëse nuk punoje mirë dhe nuk kishe rezultate. Ndaj dhe nuk ishin të pakët ata kuadro që përfundonin në burg, për atë që sistemi e shikonte edhe si sabotim, në rast se diçka nuk shkonte.
Fillimisht, në vitin 1958 ai caktohet shef i Repartit të Mjeteve të Rënda, pranë NSHRMN-së, një nga ndërmarrjet më të fuqishme të asaj periudhe që riparonte makineritë e rënda: buldozerë, eskavatorë, për bonifikime të zonave kënetore si dhe ndërtime. Duke parë aftësitë dhe cilësitë njerëzore në komunikim, ai kalon në një sektor më të rëndësishëm më vonë. Emërohet në detyrën e Shefit të Byrosë Teknike të kësaj ndërmarrjeje. Këtu, pas detyrave të dhëna, u morr edhe me projektimin e një fabrike çimentoje me kapaciete 20. 000 ton për kombinatin “Josif Pashko” të Tiranës.
Më pas, nga Byroja Teknike e ORMN-së. inxhinier Kërtusha emërohet në detyrën e shefit të Byrosë Teknike Uzinës së Radiotelevizorëve dhe vetëm pak vite më vonë, ai kalon me detyren e Kryeinxhierit të UEM-it. Dhe më pas atë e caktojnë në një detyrë tjetër të rëndësishme, në atë të Shefit te Seksionit Tekniko Shkencor të Komitetit Ekzekutiv të Rrethit te Durrësit. Ishte Pedagog në filialin e Universitetit të Tiranës në Durrës në degën e Inxhinierisë Mekanike dhe për një periudhe 10-vjeçare ka qenë konsulent, udhëheqës dhe oponent i studentëve të Universitetit të Tiranës.
Jetëshkrimi i tij është njëherësh dhe jetëshkrim i një personazhi të shquar të qytetit të Durrësit. Inxhinier kërtusha zgjodh deputet i Kuvendit Popullor në 2 legjislatura. Ne vitin 1999 ndahet nga jeta pas një aksident të rëndë automobilistik. /tesheshi.com/
