Çmimet e naftës ranë sot në tregjet ndërkombëtare nën 94 dollarë, teksa investitorët kanë frikë për kërkesën në kushtet e masave të shtrënguara epidemiologjike në Kinë, inflacionit të lartë dhe rritjes së normave të interesit.
Në tregun e Londrës, çmimi i një fuçie pas mesditës ishte me 1.95 dollarë më i ulët se mbyllja e djeshme dhe arriti në 93.69 dollarë. Pothuajse me të njëjtën sasi ra në tregun amerikan, ku një fuçi u tregtua me 87.57 dollarë.
Tregtarët po monitorojnë me ankth përhapjen e COVID-19 në Kinë.
Masat e rrepta epidemiologjike në ekonominë e dytë më të madhe në botë, si dhe presionet e kostos, ulën aktivitetin në industrinë aziatike në gusht, duke lënë në hije perspektivat për rimëkëmbjen e rajonit nga efektet e pandemisë, tregoi hulumtimi i publikuar të enjten.
Qendra teknologjike e Shenzhen në Kinën jugore ka shtrënguar masat për shkak të përhapjes së vazhdueshme të infeksionit, duke ndaluar tubimet e mëdha dhe argëtimin në ambiente të mbyllura në rrethin Baoan për tre ditë.
Politika e tolerancës zero të Kinës ndaj COVID-it po frenon ekonominë, që nënkupton gjithashtu kërkesë më të dobët për produkte energjetike.
Tregjet janë gjithashtu të shqetësuara për inflacionin rekord dhe njoftimin e një rritjeje agresive të normave bazë të interesit në SHBA dhe Eurozonë për të frenuar rritjen e çmimeve.
Ringjallja e marrëveshjes së vitit 2015 për programin bërthamor të Iranit do të nënkuptonte më shumë furnizim pasi do të lejonte që nafta iraniane të kthehej në treg.
Presidenti francez Emmanuel Macron tha se shpresonte se një marrëveshje mund të arrihet në ditët në vijim.
Anëtarët e Organizatës së Vendeve Eksportuese të Naftës prodhuan 29.6 milionë fuçi në ditë në gusht, sipas një sondazhi të Reuters, më së shumti që nga prilli 2020. Dhe prodhimi amerikan në qershor arriti nivelin më të lartë që nga pranvera 2020, me 11.82 milionë fuçi në ditë.
“Kërkesa për naftë në Perëndim, por edhe në Kinë, është në stanjacion, ndërkohë që oferta po rritet ngadalë, kryesisht falë bumit të prodhimit të argjilës në SHBA”, vëren Norbert Rucker i bankës zvicerane Julius Baer.
Më vete, OPEC njoftoi se një fuçi e shportës së naftës të anëtarëve të tij ra 5.37 dollarë në 101.04 dollarë të mërkurën. /tesheshi.com/
