Një ditë pas vizitës së kryeministrit Rama në Mirditë, Partia Demokratike e akuzon atë se po bën propagandë me fasada. Deputetja e zonës, Albina Deda thotë se fshatrat e Mirditës janë të izoluar nga varfëria dhe mungesa e infrastrukturës, ndërsa Rama sipas saj financon me 1.7 euro qendrën e qytetit.
“Nuk është aspak normale që të investohen për qendrën e qytetit të Rrëshenit 1.7 milion euro, në një kohë që të gjitha njësitë administrative të Mirdites janë të izoluara për shkak të rrugëve të shkatërruara. Ky investim nuk mund të jetë prirotet për Mirditën. Sheshi ishte i investuar edhe më parë nga pushteti lokal. Ishte në një gjendje të mirë, por jo prioritet, duke parë gjendjen e mjerë të rrugëve që lidhin njësitë administrative. Sot, të gjitha rrugët janë në një gjendje të mjerueshme, janë në gjendje katastrofë”, tha Deda.
Deputetja e Partisë Demokratike i ka bërë thirrje qeverisë që t’i kthejë sytë edhe nga zonat rurale, pasi banoret janë në mëshirë të fatit, nga mungesa e investimeve.
Shefi i qeverisë, i shoqëruar nga kryetari i bashkisë, Ndrec Dedaj inspektoi dje në terren ecurinë e punimeve për rivitalizimin e sheshit të Rrëshenit, në kuadër të rilindjes urbane. Pjesë e këtij projekti janë edhe ndërtimi i një shkolle të mesme, pedonalen dhe disa rrugë të rëndësishme për qytetin./tesheshi.com
