Zv. kryeministri Fatmir Limaj, pas takimit që zhvilloi të mërkurën me ambasadoren jorezidente të Izraelit për Kosovën, Alona Fisher-Kamm dhe një delegacion investitorësh nga ky shtet, ka dhënë lajmin se investitorët nga Izraeli “besojnë në potencialet që ka Kosova, besojnë në infrastrukturën, dëshirën dhe gatishmërinë e qeverisë për të investuar”.
“Është një hap i parë i një bashkëpunimi konkret në planin ekonomik dhe më vjen mirë që këta investitorët e kanë mbështeten dhe inkurajohen nga shteti izraelit dhe veprimet e nisura nga kjo qeveri po vlerësohen dhe respektohen nga të tjerët. Pas vendimeve të pezullimeve të shitjes së tokave tona po vijnë investitorët të cilët janë të gatshëm të investojnë në Kosovë”, tha Limaj, duke thekuar se në takim ka pasur edhe investitorë serioz të sektorit të bujqësisë.
Limaj tha se Izraeli është lider në zhvillimin e potencialeve bujqësore dhe ardhja e tyre në Kosovë dhe sjellja e përvojës dhe investimet në bujqësi është lajm i mirë për Kosovën dhe mbi të gjitha mundësi që të hapen vende të reja të punës.
Ambasadorja Alona Fisher-Kamm, tha se janë këtu për të rritur bashkëpunimin bazuar në të kaluarën tonë të përbashkët dhe duke shikuar drejtë të ardhmes.
“Besojmë se partneriteti në mes të kompanive izraelite dhe kosovare do të jetë dobiprurës për të dyja palët dhe do të kenë përfitime dhe shumë qytetarë do ta ndjejnë në mënyrë direkte këtë”, theksoi ambasadorja Fisher-Kamm, duke u shprehur e inkurajuar nga përkrahja qeveritare dhe miqësia mes dyja vendeve.
Ndërsa biznesmeni nga Izraeli, Joshua Shlomiuk nga kompania OAPI, tha se ndihet i lumtur që është i pari që do të mund ta ndihmojë bashkëpunimin mes Kosovës dhe Izraelit. “Qëllimi jonë është të ndërtojmë një projekt për një investim 100 milionë dollarësh, i cili do të krijonte nga 800 deri në 1000 vende pune dhe për të kontribuar në arsimimin e fermerëve me teknologjinë më moderne”, tha ai. /tesheshi.com/
