Nga Bashkim Kastrati
Instituti GAP ka filluar të monitorojë realizimin e premtimeve që kanë bërë kryetarët e komunave të Kosovës gjatë fushatës zgjedhore për zgjedhjet lokale. Kjo formë e monitorimit do të bëhet në mënyrë të vazhdueshme dhe në formë online do të përditësohet, varësisht se sa janë realizuar premtimet.
Këtë radhë kemi zgjedhur dy kryetarë të komunave të mëdha atë të Prishtinës, Shpend Ahmeti tashmë pa parti politike dhe Lutfi Haziri nga Lidhja Demokratike e Kosovës.
Shpend Ahmeti, gjatë fushatës elektorale ka bërë 81 premtime dhe sipas barometrit të institutit GAP, deri më tani nuk ka filluar me realizimin e asnjë premtimi.
Premtimet e kryetarëve të komunave janë evidentuar nga Instituti GAP bazuar në paraqitjet që kanë pasur kandidatët nëpër debate televizive, nga aktivitetet e tyre në terren gjatë fushatës zgjedhore si dhe bazuar në programet përkatëse elektorale.
Disa nga premtimet e Shpend Ahmetit janë: vendosja e katër E-kioskave nëpër bashkësi lokale; themelimi i Drejtorisë së Parqeve; Ndërtimi i pesë shkollave në Prishtinë: “Sofali”, “Kalabri”, “Arbëri”, “Mati 1”, dhe në zonën “Prishtina e re”; ofrimi i pronave komunale në shfrytëzim për biznese dhe bujq; ndërtimi i parkingut nëntokësor te Fakulteti Filologjik gjatë vitit 2018; ndërtimi i tregut të ri; rregullimi i varrezave të dëshmoreve në Prishtinë; Përfundimi i dy kolektorëve të kanalizimit në lagjet ‘Mat’ dhe ‘Kalabri.
Në fushën e shëndetësisë, Ahmeti është zotuar se do të realizojë këto punë: Funksionalizimi i Spitalit të Përgjithshëm të Prishtinës në vitin 2019, Ndërtimi i një QMF-je në lagjen “Veternik”, Një autoambulancë do të jetë e dedikuar në hapësirat e parkut të Gërmisë.
Këto janë disa nga 83 premtimet e Ahemtit dhe ai ka edhe gati katër vite për t’i realizuar këto zotime. Në mandatin e kaluar ai është ankuar se po bllokohet nga anëtarët e Kuvendit Komunal të Prishtinës që vinin nga partitë tjera. Kur dukej se këtë problem e kapërceu, ndodhi ndarja në Lëvizjen Vetëvendosje dhe Shpend Ahmeti ka dhënë dorëheqje dhe nuk dihet nëse ai do ta ketë përkrahjen e anëtarëve të Kuvendit Komunal që janë nga radhët e Lëvizjes Vetëvendosje.
As Lutfi Haziri nuk ka filluar zbatimin e premtimeve
Edhe pse gara për Komunën e Gjilanit pritej të jetë më e ngushtë, në balotazh Lutfi Haziri i LDK-së fitoi me lehtësi. Ai pati një fushatë dinamike elektorale dhe bëri shumë premtime për qytetarët e Komunës së Gjilanit.
Haziri ka bërë 32 premtime gjatë fushatës elektorale për zgjedhjet lokale. Sipas institutit GAP, asnjëra nga këto premtime nuk ka filluar të realizohet.
Disa nga 32 premtimet e Lutfi Hazirit janë: ofrimi i shujtave për nxënës të ciklit të parë në shkollat fillore; vendosja e kamerave në të gjitha shkollat; ndërtimi i hapësirave të banimit për studentë në partneritet publiko-privat; investime në zgjerimin dhe instalimin e sistemit të ujitjes për toka bujqësore; furnizimi i gjithë fermerëve me plehra artificialë dhe farëra; ofrimi i 200 multikultivatorëve për fermerë; funksionalizim i gjithë ujësjellësve nëpër fshatra ku nuk janë të lidhur me burimin e ujit; zgjerimi i rrjetit të ujësjellësit në të gjitha vendbanimet rurale etj.
Tesheshi.com do të vazhdojë të raportojë për (mos)realizimet e premtimeve në mënyrë periodike nga këto dy komuna, por edhe nga komunat e tjera të Kosovës. /tesheshi.com/
