Në një objekt pothuajse të rrënuar, me dy dhoma me mure të çara, lagështi e myk në çdo qoshe, jetojnë prej 16 vitesh 6 anëtarët e familjes Sylejmani, nga fshati Shallc i komunës së Vushtrrisë.
Por kjo s’është më e keqja. Kryefamiljari Gani Sylejmani, invalid i UÇK-së ka frikë se do e largojnë edhe nga baraka në të cilën jeton tani.
“Jetojmë në këtë objekt prej 16 vitesh. Jemi nga Shallci dhe këtu na ka sjell ish-TMK.Këtu jetoj bashkë me gruan tre fëmijët dhe vëllain, i cili është invalid i luftës.
Kanë thënë se do t’i rrënojnë këto baraka dhe do të na largojnë nga këtu sepse objektin përballë barakave po e shndërrojnë në muze. Për këtë objekt janë dhënë 470 mijë euro, me këto para do të mund të strehoheshin 10 familje.
Mirëpo megjithëse nuk e bëjnë këtë, po na largojnë edhe ne. Nuk më ka mbetur gjë tjetër, vetëm të marrë fëmijët, gruan, e vëllain e të shkoj të hidhem në lumin Sitnica, se zgjidhje tjetër nuk kemi”, thotë Ganiu për arbresh.info.
Ai tregon se tërë ditën del në qytet për të kërkuar punë e në mbrëmje kthehet i dëshpëruar, ndërsa shton se jeton me pagën sociale të tijën dhe të vëllait.
“Tani marr vetëm 100 euro pagesë sociale, ndërsa vëllai si invalid merr 75 euro, të cilat i përdorim jo vetëm për ushqime, por edhe për ilaçe”, tregon ai.
I pyetur nëse kishte trokitur në dyert e institucioneve komunale në Vushtrri për të kërkuar ndihmë, Ganiu thotë se ka shkuar shumë herë por e kanë përzënë./tesheshi.com/
