Sinjalizuesi Frances Haugen ka zbuluar një seri dokumentesh tronditëse që “vërtetojnë se Facebook shpesh i ka dhënë përparësi rritjes mbi sigurinë”, shkruan BBC.
Në një intervistë për emisionin “60 minuta” të rrjetit amerikan CBS, ajo tha se la pozicionin e drejtuesit të ekipit për integritetin qytetar në Facebook, pasi u zemërua për shkak të etikës së biznesit të kompanisë.
Ajo ka ndarë dokumente të diskutueshme me Wall Street Journal, e cila ka nxjerrë materiale për publikun gjatë tre javëve të fundit, shpesh duke i përshkruar ato si “skedarë të Facebook”.
Dokumentet thuhet se tregojnë se të famshmit, politikanët dhe përdoruesit e profilit të lartë të Facebook trajtohen ndryshe nga përdoruesit e zakonshëm. Dokumentet zbuluan se politikat e moderimit u aplikuan ndryshe, ose nuk u aplikuan fare në llogari të tilla – nga një sistem i njohur si XCheck (kontroll i kryqëzuar).
Dokumentet tregojnë gjithashtu se Facebook kërcënohet me një padi nga një grup aksionerësh.
Sidoqoftë, akuzat kundër Instagram ishin me shqetësim të veçantë për politikanët amerikanë.
Një studim i kryer nga Facebook tregoi se Instagram ka pasoja serioze për shëndetin mendor të adoleshentëve dhe Facebook nuk i ndau rezultatet e atij hulumtimi me publikun.
Thuhet se deri në 32 përqind e vajzave adoleshente të anketuara thanë se ndiheshin keq për trupin e tyre dhe përdorimi i Instagramit i bëri ato të ndiheshin më keq.
Haugen nuk e kurseu ish-punëdhënësin në raportin e saj.
“Kishte një konflikt interesi midis asaj që është e mirë për publikun dhe asaj që është e mirë për Facebook,” tha ajo.
“Facebook ka vendosur vazhdimisht të veprojë në interesin e tij, për hir të fitimit të më shumë parave.”
Por Facebook mohoi akuzat, duke thënë se ata shpenzuan shuma të mëdha parash për sigurinë:
“Pretendimi se ne po mbyllim sytë ndaj reagimeve po neglizhon investimet e rëndësishme, duke përfshirë përpjekjet e 40,000 njerëzve që punojnë në sigurinë e Facebook, si dhe investimin tonë prej 13 miliardë dollarësh që nga viti 2016,” tha Lena Pietsch, drejtoreshë e politikës së komunikimit në Facebook.
Haugen gjithashtu përmendi trazirat në Capitol Hill në janar, duke pretenduar se Facebook ndihmoi në nxitjen e dhunës.
Ajo tha se Facebook përfshinte sisteme sigurie për të zvogëluar dezinformatat gjatë zgjedhjeve amerikane – por vetëm përkohësisht, shkruan BBC.
Ishte gjithashtu një nga temat kryesore që Haugen dëshmoi para Kongresit.
“Menaxhmenti i kompanisë di si t’i bëjë Facebook dhe Instagram më të sigurt, por ata qëllimisht nuk duan ta bëjnë këtë në mënyrë që të mos rrezikojnë fitimet e tyre astronomike,” tha Haugen.
Ajo pastaj kritikoi themeluesin e Facebook, Mark Zuckerberg.
Ajo tha se Zuckerberg ka kontroll të jashtëzakonshëm mbi kompaninë pa e mbajtur askënd përgjegjës. /tesheshi.com/
