Shkrimtari i njohur antimafie flet një ditë para vizitës në Tiranë
Nga Nefail Maliqi
Roberto Saviano, shkrimtari më i njohur antimafie në Europë, flet për krimin e organizuar shqiptar, i cili zotëron asete dhe pjesë të madhe të ekonomive kombëtare në Shqipëri, Kosovë dhe në Europë, madje është bërë rrezik për ecjen përpara.
Nesër Saviano do të jetë në Tiranë i ftuar të marrë pjesë në Panairin e Arteve Pamore dhe Librit. Një ditë para se të vijë në kryeqytetin shqiptar, Saviano, autori i bestsellerit “Gomorra” i cili do të flasë për librin e tij “Zero” flet në veçanti për trafikantët e drogës në Europë, ku shqiptarët janë pjesë e rëndësishme e këtij trafiku. Ai mori pjesë në një konferencë ndërkombëtare në Lozanë të Zvicrës për çështjet e kriminalitetit të organizuar. Si gjithnjë i shoqëruar nga 10 truproja. Është i dënuar me vdekje jo vetëm nga Camorra napoletane por edhe nga pjesë të tjera të krimit të organizuar. Në një bisedë për “Presheva Jonë” dhe “tesheshi.com”, Saviano vendos gishtin në plagë dhe flet hapur..
Roberto, ju e njihni mirë krimin e organizuar dhe atë shqiptar në veçanti, cili është roli i tij sot?
Shiko koleg, krimi i organizuar dhe trafiku i drogës në Ballkan po ecën përpara sipas rrugëve tradicionale. Bandat e fuqishme në rajon bashkëpunojnë fuqishëm. Krimi i organizuar dhe korrupsioni janë bërë një kancer për Kosovën dhe Shqipërinë dhe janë pengesa më e madhe e këtyre vendeve në rrugën drejt integrimit europian.
Eksodi është një fenomen i dhimbshëm i shqiptarëve kohëve të fundit…
Dhe mund të thuhet hapur se mafia që kontrollon drogën është edhe ajo që organizon, mbron dhe rregullon këtë eksod dramatik, faktet që dalin çdo ditë vetëm e vërtetojnë këtë. Trafiku i qënieve njerëzore është jo vetëm logjistika perfekte e transportimit të drogës, por është pjesë e rëndësishme e fitimit dhe kontrollit të territorit. Këtu vepron e gjithë mafia rajonale…
Cila është mafia më e fortë në rajon?
Padyshim mafia kosovare, ajo ka edhe lidhje shumë të forta jo vetëm në territor por edhe në institucione. Shikoni, kemi të bëjmë me një fenomen interesant: mafia kosovare, konkurrenten dhe rivalen më të egër në kontrollin e trafikut të drogës ka mafien që vjen nga Shqipëria, që cilësohet si mafia shqiptare në Europë. Dhe ndërsa politika po flet për bashkim të Shqipërisë me Kosovën, krimi i organizuar ka një axhendë të ndryshme. Mafia kosovare bashkëpunon ngushtë me mafien serbe dhe atë rajonale kundër mafias shqiptare, duke e luftuar egërsisht atë.
Çfarë mendoni për krijimin e Gjykatës Speciale në Kosovë?
Unë mendoj se nuk ka asnjë problem negativ. Kjo do të ndihmonte imazhin e një shteti të ri në Europë. Nëse autoritetet e Kosovës i kanë duart e pastra, kjo gjykatë nuk do të ketë asnjë problem.
Keni folur për mafian shqiptare që është e tmerrshme, jo vetëm likuidon kundërshtarët por merret me pasardhësit…
Kam përshkruar raportet faktike të organeve ligjzbatuese. Ju e dini kemi të bëjmë me një realitet që e flasin të gjithë, në rradhë të parë miqtë e mij shqiptarë që janë bashkëpunëtorë të mirë dhe kërkojnë çlirimin nga krimi….
/tesheshi.com/
