“Ne nuk do presim Serbinë. Nuk shkojmë në NATO me shoqatën e gjuetarëve apo peshkatarëve, por me ushtri”, thotë presidenti i Kosovës, Hashim Thaçi në një intervistë me faqen “Konica.al” për gazetarin Mentor Nazarko. Sipas numrit një të shtetit të Kosovës, asgjë në nismën e tij nuk ka lidhje me gjykatën Speciale apo për të marrë diçka në shkëmbim.
Sipas tij, krijimi i ushtrisë është shumë e nevojshme, duke pasur parasysh tensionet që krijohen vazhdimisht në rajon.
“Askush nuk të pranon në NATO me zjarrfikës, shoqatë gjuetarësh apo ndonjë shoqatë tjetër, për shembull peshkatarësh”, ka thënë Thaçi në intervistën për “Konica.al”. Presidenti vlerëson se Kosova është e zonja e vetes dhe mund të marrë vendime të rëndësishme për vendin.
Thaçi thekson më tej se nuk mund t’i paguajë Kosova, dështimet që ndodhin në vendet e rajonit.
“Kosova nuk mund të mbetet peng i krizave të Ballkanit. Nëse Bosnje-Hercegovina është e bllokuar nga nacionalizmi serb, atëherë natyrisht që gjërat janë të ndërlidhura edhe në rajonin tonë, por pse ta paguajmë ne çmimin? Nëse Serbia e rrit nacionalizmin e saj, zhvillon një fushatë elektorale kryekëput nacionaliste, nëse Serbia ka hapur mendje, shpirt dhe gjithçka ka për praninë ruse, pse ta paguajë Kosova çmimin?”, ka thënë ai.
E njëjta logjikë përdoret prej tij edhe për rastet e vendeve të tjera të rajonit.
Pyetur për kundërshtimin amerikan, Thaçi shprehet i sigurtë se Kosova do ta ruajë partneritetin me Amerikën.
“SHBA, e theksoj, ka qenë shumë afër prej ditës së parë të themelimit të forcës së sigurisë së Kosovës. Kanë pasur ekspertët e vet dhe i kanë edhe në NATO, prandaj çdo hap duhet të bëhet i koordinuar edhe e theksoj, do ta bëjmë. Forcat e armatosura të Kosovës, janë një forcë multietnike dhe ne do ta ruajmë partneritetin. Ky proces ka filluar dhe garantojë se do të përmbyllet suksesshëm në partneritet me BE-në”, thotë Thaçi. /tesheshi.com/
