Fluksi i paprecedent i refugjatëve është “përgjegjësi” e Europës e cila ka mbështetur dhe vijon të mbështesë terrorizmin. Këto janë fjalët e presidentit sirian, Bashar al Assad gjatë një interviste me mediat ruse. “Europa, sipas tij, i quan terroristët të moderuar dhe i ndan në grupe, por të gjithë janë ekstremistë”.
Assad ka hedhur një sërë akuzash ndaj Perëndimit dhe Turqisë, që sipas tij, ndihmojnë terroristët duke i furnizuar me armë, para e vullnetarë. Në intervistën e dhënë në Damask, Assad ka akuzuar shtetet perëndimore dhe Turqinë se po financojnë frontin Al Nusra.
Assad mbajti të njëjtin qëndrim sfidues ndërsa deklaroi se nuk jep dorëheqjen për shkak të presionit nga perëndimi. “Nëse vendos populli që presidenti duhet të qëndrojë, ai qëndron, në të kundërt, largohet menjëherë”, iu shpreh Assad, duke shtuar se ai nuk mund të japë dorëheqjen se këtë e kërkojnë Shtetet e Bashkuara, BE apo OKB.
Në fund, ai thotë se është i gatshëm të bashkëpunojë me Perëndimin në luftën kundër terroristëve, një qëndrim i përkrahur fort nga Moska por që nuk ka gjetur mbështetje nga amerikanët dhe shtetet e BE-së. /tesheshi.com/
