Ndryshe nga një javë më parë kur dha një intervistë për AFP-në, kreu i diplomacisë kosovare, njëherësh dhe numri dy i qeverisë së Prishtinës, Hashim Thaçi, nuk e ka përmendur sërish faktin se ai dhe familja e tij është kërcënuar nga vetë kreu i ISIS-t famëkeq, El Bagdati.
Në një intervistë për austriaken “Profil”, ai ka folur për të tjera çështje ku ka veçuar mungesën e liberalizimit të vizave, duke pohuar se shqiptarët e Kosovës, edhe në kohën e Titos ishin më pak të izoluar sesa sot, një e vërtetë kjo për hir të së vërtetës dalë nga goja e Thaçit.
“Shumica dërrmuese e popullsisë së Kosovës është unanime në lidhje me faktin se vendi ynë duhet të bashkohet me BE sa më shpejt që të jetë e mundur. Hapi tjetër për ne do të ishte liberalizimi i vizave, që unë shpresoj se do të bëhet deri në fund të këtij viti”, tha Thaçi.
Sa për krizën e rëndë politike që po kalon Kosova, ai ia adresoi atë tërësisht opozitës, duke e akuzuar se ajo kërkon veç ta marrë pushtetin me pretendimet e saj.
“Marrëveshjen për qytetet me banorët shumicë serbe, opozita e përdor si një mundësi për të sulmuar qeverinë dhe për të provokuar zgjedhje të reja”, shtoi ai.
Thaçi i ka konsideruar “pranverë” raportet mes Kosovës dhe Serbisë.
“Të dyja vendet duhet të bashkohen me BE, në të njëjtën kohë. Atëherë njohja e Kosovës nga ana e Serbisë do të ishte një hap logjik. Kosovarët dhe serbët kanë qenë në konflikt për gati një shekull, tani është hera e parë e një dialogu dhe për paqe. Do të jetë më mirë për Serbinë në qoftë se ajo e njeh Kosovën, për ta liruar veten nga barra historike”, deklaroi Hashim Thaçi, që këto ditë aspiron dhe të bëhet president i Kosovës, gjë e cila kundërshtohet fuqimisht nga opozita. /tesheshi.com/
