“Ballkani ndodhet nën rrezikun e rrëshqitjes nën ndikimin rus, nëse administrata Trump injoron rajonin”. Kështu u shpreh kryeministri Edi Rama në një intervistë me gazetën britanike, “The Telegraph”.
Në këtë intervistë, ashtu si edhe komenton vetë gazeta, Rama merr në konsideratë edhe dyshimet nëse Bashkimi Europian po bën mjaftueshëm për të siguruar stabilitetin në rajon dhe për të bllokuar komplotet e dyshuara të Moskës.
Intervista mbulon një spektër të gjerë çështjesh. Gazeta e përshkruan Edi Ramën, si kryeministrin karizmatik të Shqipërisë, dhe në komentin e shkurtër që paraprin intervistën thekson deklaratën e tij se pa mbështetjen e Shteteve të Bashkuara, “Ballkani mund të mos jetë një vend ku të mbizotërojë paqja dhe bashkëpunimi”.
“Për SHBA, kjo zonë është shumë e rëndësishme nga ana strategjike, dhe SHBA janë shumë të rëndësishme për ne”, ka theksuar Rama në intervistë.
Duke marrë në konsideratë rolin e dukshëm të Rusisë në komplotin e vrasjes së kryeministrit në Malin e Zi, që është mbuluar nga “The Telegraph” në një artikull të kësaj javë, gazeta shton se ka shqetësime se mundesa e interesit të Uashingtonit në Ballkan, do të forcojë Moskën.
Rama duket se është gjithashtu, i këtij mendimi, kur thotë se “Rusia ka qenë e interesuar në përhapjen e ndikimit të saj, ndërkohë që realisht ka shumë ndikim në rajon”. /tesheshi.com/
