Fitimi sërish i kampionatit italian pas më shumë se dy dekadash do të vazhdojë të mbetet një ëndërr për skuadrën napolitane, duke u kthyer dalëngadalë në një makth që nuk i shqitet për asnjë çast.
Dhe në vitin më të mirë për Napolin, pikërisht kur Juventusi dukej një skuadër e mbaruar, kur Roma sillej nga një fitore në një humbje, kur skuadrat e Milanos nuk ngjallnin asnjë lloj emocioni, i tërë mundi ka vajtur kot. Nuk ka trofe për Napolin!
Napoli paguan çmimin e mbështetjes te një lojtar i vetëm. Higuain mund të jetë një lojtar klasi, një sulmues që shënon pa fund, por është krejt e pamundur që ai të mbajë mbi shpatulla shpresat e një qyteti të tërë. Duke shpërthyer në fund. Dhe pa të, skuadra napolitane duket e mbetur jetim.
Siç u duk edhe mbrëmë, ndaj Interit, ku edhe pse qe në zotërim të lojës, u pa t’i mungonte pikërisht ai, Gonzalo Higuain, i dënuar me tre ndeshje pezullim.
Interi u tregua i pamëshirshëm ndaj Napolit në “Giuseppe Meazza”. Fitoi 2-0, mbajti gjallë shpresat e veta për një vend të tretë dhe u dha dërrmën atyre të Napolit për të fituar kampionatin.
E vlefshme për javën e 33-të të Serisë A, ndeshja Inter – Napoli filloi menjëherë me gol. Icardi i kaloi vendasit në epërsi që në minutën e katërt. Edhe pse miqtë qenë në kontroll të lojës, atyre u mungoi thellësia e aksioneve, si dhe goditja e fundit. Mungesa e argjentinasit në sulm qe lehtësisht e dukshme.
Rezultati u thellua në fundin e pjesës së parë, ndërsa Brozovic i ndëshkoi për herë të dytë napolitanët. Çka pasoi nuk ndryshoi asgjë në rezultatin përfundimtar të lojës, të mbërthyer në shifrat 2-0.
Me fitoren e së shtunës, Interi gjendet vetëm tre pikë larg Romës së vendit të tretë, që sot luan në mesditë, në transfertë, ndaj Atalantës. Vendi i tretë, që të mundëson pjesëmarrjen në Champions League sezonin e ardhshëm mbetet një objektiv i arritshëm për Interin.
Me vetëm pesë javë gjer në fund të kampionatit, teksa Juventusi kryeson kampionatin me gjashtë pikë diferencë e nuk ka luajtur ende ndaj Palermos, fitimi i titullit është kthyer në një mision të pamundur për Napolin me humbjen e mbrëmshme. Objektivi parësor për të mbetet tani ruajtja e vendit të dytë, që rrezikohet nga Roma. /tesheshi.com/
