Eshtë tashmë e ditur që për Elseid Hysajn ka interesim nga shumë skuadra, ndër të cilat janë përmendur ca nga më të njohurat në futbollin anglez. Por agjenti i tij sjell në vëmendje dhe ekipin e Interit në Serinë A.
Mario Giuffredi, agjenti i mbrojtësit 22-vjeçar, ka thënë për një radio napolitane se Interi e pëlqen klientin e tij.
“Ai është një lojtar që ata e pëlqejnë”, bëhet e ditur të jetë shprehur ai për stacionin radiofonik.
Megjithatë, agjenti nuk ka lënë pa kujtuar se gjithçka është akoma thjesht një pëlqim.
“Kur bisedova me Ausilio-n (drejtorin sportiv), ai më tha se e pëlqente lojtarin. Por të bisedosh rreth admirimit është një gjë, e të bisedosh rreth negociatave është një gjë tjetër.”
Hysaj ka nënshkruar një kontratë të re me Napolin vetëm dy muaj më parë, në tetor, që parashikon qëndrimin e tij në klub gjer në vitin 2021, por nuk duket të jetë e largët dita kur atë ta shohim të veshë bluzën e një tjetër skuadre të madhe, qoftë në Itali, Angli, apo diku tjetër. /tesheshi.com/
