Ditët e holandezit Frank de Boer te Interi janë të numëruara pas humbjes së mbrëmshme në Europa League ndaj izraelitëve të Hapoel Bir Shevas.
I sjellë te Interi vetëm pak javë më parë, ndërsa zëvendësoi Roberto Mancini-n e larguar, De Boer ka dështuar deri tani në përpjekjen për ta kthyer Interin në binarët e një skuadre të suksesshme.
Vetëm një fitore në katër takime të sezonit të ri, dhe ajo ndaj Peskarës, e me shumë mundim. Tre gola të shënuar në këto katër takime, e me vetëm një autor: Mauro Icardi-n.
Ndeshja ndaj Juventusit të dielën, në kampionatin italian, besohet se do të jetë mundësia e fundit për De Boer-in. Një humbje do të jetë me gjasa e barabartë me largimin e tij.
Mediat sportive italiane kani nisur të flasin për zëvendësimin e tij me Fabio Capello-n, që prej kohësh nuk drejton një skuadër italiane.
Tashmë 70 vjeç, Capello ka drejtuar për herë të fundit përfaqësuesen ruse, nga ku u largua pa ndonjë sukses. Ai nuk e ushtron detyrën e tij në Itali prej dhjetë vitesh. /tesheshi.com/
