Ndeshja e javës së 35-të të Serisë A midis Interit dhe Udinezes ka qenë e veçantë në llojin e vet. Jo për rezultatin, por për hedhjen në fushë në fillim të takimit të 22 lojtarëve të huaj.
Asnjë prej ekipeve, si Interi dhe Udineze, nuk kishin qoftë dhe një futbollist të vetëm italian. Kjo ishte hera e parë që ndodhte diçka e tillë në Serinë A. E në kampionatet më të mira europiane, është rasti i dytë pas atij në Premier Ligën angleze, në fund të dhjetorit të 2009-ës, kur Portsmuthi ndeshej me Arsenalin.
Loja mes 22 lojtarëve me 14 kombësi të ndryshme nisi më mirë për udhëtuesit. Udineze kaloi në epërsi në minutën e 9-të. Autori i golit ishte Thereau.
Vendasit në “Giuseppe Meazza” janë në luftë për vendin e tretë, edhe pse është disi e vështirë ta arrijnë atë objektiv. Gjithsesi, ata ia dalin të barazojnë e të kalojnë në avantazh me golat e Jovetic-it, të realizuar në minutën e 36-të dhe të 75-të. Goli i Eder-it në të 95-ën minutë thjesht thelloi shifrat e vulosi rezultatin 3-1.
Katër pikë e ndajnë Interin e vendit të katërt nga Roma e vendit të tretë, por kryeqytetasit kanë një ndeshje më pak.
“Ne duhej të fitonim për të mbajtur një fije shprese gjallë, sepse në futboll ndodhin gjëra të çuditshme. A ka keqardhje? Le të presim. Njerëzit po përpiqen të arrijnë në përfundimin se ne kemi patur një sezon katastrofik, por nuk është kështu,” ka deklaruar trajneri i Interit, Roberto Mancini, pas ndeshjes. /tesheshi.com/
