Interi ia ka dalë të fitojë 0-2 në “San Paolo” përballë Napolit në çerekfinalet e Kupës së Italisë. Stevan Jovetic dhe Adem Ljajic kanë vënë firmat në këtë fitore me golat e tyre, duke i mundësuar ekipit ku luajnë kualifikimin për në gjysmëfinalet e aktivitetit.
45 minutat e pjesës së parë kaluan pa një ndryshim rezultati, ndërkohë që të dyja skuadrat i vizituan portat respektive. Pjesa e dytë u kthye në një dramë të vërtetë, me gola, tension, e kartona. Në një kundërzbritje të miqve, qe malazezi Stevan Jovetic që me një goditje të saktë nga distanca ka shtangur gardianin Reina, për t’i kaluar nerazurët në epërsi në minutën e 74-t.
Vendasit e kërkuan me çdo kusht barazimin më pas, por ishin sërish miqtë ata që shënuan. Një ekspert i momenteve të tilla, Adem Ljajic do ta çonte sërish topin në rrjetën e napolitanëve në minutën e 92-të, duke i dhënë fund çdo shprese të tyre.
Goli i dytë u shoqërua me një debat të ashpër mes dy trajnerëve, me Mançinin që u pa t’i hakërrehej Sarrit. Më herët, dy minuta para përfundimit të takimit, gjyqtari e pati lënë Napolin me dhjetë lojtarë, pas nxjerrjes me karton të kuq të Mertensit.
Interi pret të mësojë sonte emrin e kundërshtarit, që do të dalë nga sfida Lacio – Juventus. /tesheshi.com/
