Juventus – Inter kishte përfunduar 3-0 më 27 janar, në ndeshjen e parë gjysmëfinale të Kupës së Italisë. E njëjta përballje do të kishte përfundimin 2-0 po për torinezët tre ditë më parë, në kuadër të Serisë A. E kështu, askush nuk e kishte menduar se mbrëmë, në takimin e dytë gjysmëfinal të Kupës së Italisë, do të kishte tjetër muzikë, ama krejt tjetër muzikë.
Interi i ka befasuar të gjithë kur ka fituar 3-0 në 90 minuta pikërisht ndaj Juventusit të pamposhtur. Një Inter i jashtëzakonshëm, me një Perisiç të shndërruar nga ai i zakonshmi që jemi mësuar të shohim, i vakët e pa energji.
Brozoviç do të shënonte dy herë, në minutën e 16-të dhe në të 82-tën, me 11 metërsh. Perisiç gjithashtu do ta vinte emrin te golashënuesit, me golin e shënuar prej tij në minutën e 49-të.
Ndeshja e mbushur me emocione pati dhe shumë momente të tjera elektrizuese. Vendasit mund të kishin shënuar në fund sërish, por gardiani i Juventusit, braziliani Neto, nuk ia dha këtë mundësi Perisiçit, që goditi rrezikshëm dy herë.
Në pjesën tjetër të fushës, Simone Zaza i Juves, edhe pse i vetëm, ngjalli panik në çdo moment, e për pak gjë mund ta kishte ndryshuar rrjedhën e lojës.
Me 90 minutat që i vunë dy takimet gjysmëfinale në barazpeshë, të detyrueshme qenë dhe dy shtesat nga 15 minuta. Që nuk sollën asgjë të re, veç drithërimave në mbarim të tyre, kur gjuajtjet e njëpasnjëshme të Moratës u pritën suksesshëm nga portieri i Interit, argjentinasi Karrizo.
Te 11-metërshat fati qe me Juventusin, me të pesë lojtarët e tij që i kthyen në gola gjuajtjet e tyre nga
pika e bardhë. Përndryshe, te Interi gaboi vetëm Palacio, që e çoi topin në traversë. Gabim që i kushtoi Interit eliminimin. Mes gjuajtësve të 11-metërshave te Interi qe dhe shqiptari Manaj, që e ekzekutoi gjakftohtësisht e mjeshtërisht penalltinë e tij.
Kësisoj, finalja e Kupës së Italisë do të jetë Juventus – Milan. /tesheshi.com/
