6 vjet pas 21 janarit 2011, i vetmi që ende nuk ka thënë asnjë fjalë në lidhje me atë ngjarje është Lulzim Basha. Për më tepër, në dhjetra intervista që nga ajo ditë, ai kurrë nuk është pyetur nga gazetarë përkatës në lidhje me katër vrasjet, duke qenë se mbante postin e ministrit të Rendit.
Madje akti i parë i politikës qeveritare pas asaj dite dhe në lidhje me atë ditë, mosdorëzimi i zinxhirit komendues të gardës pas urdhër-ndalimit të lëshuar nga Prokuroria me firmë të Ina Ramës, kishte të bënte drejtpërdrejt me dikasterin e tij. Siç u pa, gjithçka u morr përsipër nga Sali Berisha dhe Basha pothuajse është shmangur me stil nga debati mbi 21 janarin.
Madje Berisha, siç ndodhi dhe tre javë më parë në Top Story, vijon të japë deklarime kurajoze lidhur me atë ngjarje, pa u druajtur dhe madje duke i qëndruar i palëkundur ndaj bindjes së katër të vrarët ishin rrjedhojë normale e zhvillimeve të asaj dite. Ndërsa Basha ka vendosur të bëjë të heshturin, ndoshta deri kur i pari intervistues do ia drejtojë një pyetje lidhur me vrasjet tragjike.
Në karrierën politike të Bashës, sot në krye të opozitës, 21 janari ishte i dy rast kur emri i tij kompromentohej me çështje drejtësie, ndonëse nuk u përball kurrë me të, madje as u rrezikua; siç ishte rasti i parë, afera 220 milioneshë e Rrugës së Kombit, ku dosja e tij u mbyll me procedurë.
Pak muaj pas janarit të përgjakur, Basha do kandidonte për kreun e Bashkisë së Tiranës, të cilën e morri pas një procesi unik, ku fjalën e fundit e tha gjykata dhe jo votat.
Por dhe sot, ku ai aspiron të rikthehet në pushtet, kësaj here jo si ministër por si kryeministër, për disa nga çështjet me sensitive të karrierës së tij politike nuk ka folur. 21 janari është kryesorja ndër to. /tesheshi.com/
