Ardhja e Roberto Mançinit në krye të klubit italian i ka këndellur jo pak neroazurët, mirëpo kjo nuk ka mjaftuar për t’u përballur me Napolin dhe Juventusin. Kësisoj, te Interi po mendojnë një tjetër zgjidhje për stolin e skuadrës, duke i përgatitur një çek të bardhë trajnerit Diego Simeone vetëm që të kthehet edhe njëherë në skuadrën ku luajti shumë vite më parë.
“El Cholo” nuk e ka mbajtur asnjëherë të fshehur dashurinë që ka për Interin, skuadrën në të cilën pati
luajtur si futbollist për dy sezone gjatë viteve 1997-1999. Mirëpo kontrata e tij e re me Atletikon e Madridit ia vështirëson negociatat për një rikthim të mundshëm në qytetin e modës.
Në tryezën e Simeones është edhe një ofertë tjetër, e cila vjen nga Argjentina. Dhe bëhet fjalë për të drejtuar skuadrën përfaqësuese. Veçse për momentin tekniku është i përqendruar tek skuadra e tij, dhe nëse do të donte të ndryshonte ambient, këtë do ta bënte vetëm për ndonjë ekip europian. /tesheshi.com/
