Debati për çeljen e negociatave të vendit për t’u anëtarësuar në BE është kthyer sërish në një arenë përplasjesh mes mazhorancës dhe opozitës, teksa akuzojnë njëra-tjetrën si përgjegjëse për bllokimin e kriterit kryesor, siç është ai rivlerësimit të pasurive të gjyqtarëve dhe prokurorëve. Akuzat e ndërsjellta vijnë një ditë pas takimit Rama-Merkel, ndërsa kjo e fundit u shpreh qartë se Shqipëria duhet të plotësojë sa më parë 5 kriteret e përcaktuara nga Bashkimi Evropian.
Kryeministri i drejton gishtin sërish kreut të opozitës, Lulzim Basha se i ka ngritur Shqipërisë një mur që i pengon asaj çeljen e negociatave, pasi ka bllokuar ligjin e Vetting-ut. Për këtë arsye, ai ka apeluar Partinë Demokratike që të zhbllokojë ligjin e Vettingut.
“Nuk mund të bëj sikur nuk e shoh atë që po bën opozita, për të rrënuar imazhin e Shqipërisë në sytë e partnerëve ndërkombëtarë, duke mos lënë shpifje pa amplifikuar lartë e poshtë, për t’i bindur se Shqipëria është një Kolumbi, që qeveria është një kartel droge dhe që Shqipëria është një gropë e zezë nga e cila të gjithë duan të arratisen”, u shpreh Rama, gjatë një takimi me veteranët, me rastin e 29 Nëntorit.
Megjithatë, Rama u shpreh optimist për vendimin që do të merret në dhjetor lidhur me hapjen e negociatave.
Nga ana tjetër, i menjëherëshëm ka qenë edhe reagimi i kreut të PD-së, Lulzim Basha. Ai u kundërpërgjigj se Vettingu po përdoret nga kryeministri si pretekst, për të mbuluar dështimet e qeverisë së tij. “Lidhur me Vettingun, unë dhe Partia Demokratike jemi gati të amendojmë ligjin pa patur nevojë që të presim Gjykatën Kushtetuese. Kushtetuta thotë që Vettingun duhet ta bëjë Kuvendi, kurse Edi Rama do ta bëjë ai vetë. Ai e ka Vettingun pretekst për të mbuluar dështimin e tij. Zgjidhja është e thjeshtë dhe mund të bëhet që tani duke respektuar Kushtetutën e vendosur me konsensus”, u shpreh Basha në një konferencë për mediat.
Sipas tij, muri që mban të izoluar Shqipërinë është muri i krimit, i drogës dhe i korrupsionit qeveritar. “Shqetësimi kryesor i liderëve europianë për Shqipërinë është depërtimi i krimit në politikë, droga dhe korrupsioni. Kjo, i është bërë e qartë Edi Ramës nga çdo politikan që ka takuar, pa asnjë përjashtim, më është bërë e qartë edhe mua si kryetar i opozitës. Shikoni mediat shtetërore italiane, gjermane, zvicerane, austriake, britanike, për të kuptuar se çfarë e shqetëson realisht Europën. Ndaj në emër të opozitës kam një thirrje të thjeshtë për Edi Ramën: Qepe! Mjaft më me sulmet e turpshme prej Don Kishoti ndaj politikanëve më të lartë nga Amerika në Austri, në Gjermani, në Hollandë, në Greqi e kudo. Mjaft më, duke shpallur armik opozitën dhe shumicën e popullit tënd!”, tha Basha.
Edhe një ditë më parë, Basha deklaroi në një njoftim për mediat, pas mbarimit të konferencës dy-palëshe Rama –Merkel se PD është e gatshme të pranojë përgjegjësitë e saj dhe se është e gatshme të nisë zbatimin e reformës në Drejtësië./tesheshi.com/
