Ka kaluar një vit e gjysmë prej kur Kosova nuk ka marrë asnjë njohje nga jashtë, përkundrazi, disa vende kanë shprehur vullnetin për tërheqjen e njohjes.
Zëvendëskryeministri në largim, Enver Hoxhaj ka deklaruar se së shpejti 10 shtete mund ta tërheqin njohjen ndaj Kosovës. Hoxhaj, për më shumë se 4 vite nga mandati i kaluar ka qenë Ministër i Punëve të Jashtme, duke qenë i përfshirë në përpjekjet për lidhje diplomatike me vende të reja.
Pas deklaratave të tij, Ministria e Punëve të Jashtme e ka kundërshtuar një gjë të tillë, duke thënë se “të paktën në këtë ministri nuk kemi informata të tilla”. Si Hoxhaj, ashtu edhe ish-drejtues të tjerë të diplomacisë kosovare, e fajësojnë po këtë dikaster qeveritar për tërheqje dhe mosprurje të njohjeve të reja për Kosovën.
Kosova është njohur nga 116 shtete, por disa prej tyre, më saktësisht 13 shtete, kanë deklaruar se e kanë rishikuar vendimin për njohje dhe rrjedhimisht e kanë tërhequr atë.
Kujtojmë se procesi i “çnjohjes” paraqet koncept të ri, pasi asnjë shtet në botë nuk është refuzuar të njihet pasi është njohur një herë.
Problemi në fjalë ka marrë “flakë” nga përpjekjet diplomatike të Serbisë, të cilat sipas raporteve, madje edhe kanë paguar shuma të mëdha te disa shtete afrikane për ta hequr njohjen.
Shtetet që kanë marrë vendim të tillë janë disa ishuj të vegjël dhe disa vende afrikane që njihen për shkallë të lartë të varfërisë dhe korrupsionit. /tesheshi.com/
