Nga Blendi Gashi
Hashim Thaçi, që nga marrja e pozitës së presidentit, në disa raste është sjellë si të ishte shef i qeverisë, për çka jo pak është kritikuar nga opozita dhe analistët.
Ai nuk ka pranuar të qëndrojë i heshtur për proceset e ndjeshme të vendit, sikur ish-presidentët Fatmir Sejdiu e Atifete Jahjaga, që kanë kuptuar pozitën e tyre siç parashihet edhe me Kushtetutë, pra që është më shumë ceremoniale e jo ekzekutive.
Thaçi ka qenë “ngacmuesi” i çdo procesi të ndjeshëm ku ka marrë iniciativa të ndryshme që kanë zgjuar reagim jo vetëm të kundërshtarëve politikë por edhe faktorit ndërkombëtarë, prej të cilave më pas është zmbrapsur.
Iniciativa për zhbërjen e Speciales…
Edhe pse nuk e ka pranuar zyrtarisht kurrë, Thaçi njihet si njeriu që ka ndërmarrë iniciativë në fund të vitit 2017-të që të shfuqizohet ligji për Gjykatën Speciale i miratuar nga Kuvendi vite më parë, pikërisht pas trysnisë që kishte bërë ndaj deputetëve të PDK-së.
Kjo inicitivë nga ndërkombëtarët u quajt “tmerruese” duke u bërë thirrje deputetëve të mos votojnë kundër shfuqizimit, ndërsa opozitarët fajësuan direkt Thaçin si iniciator duke thënë se duhet të japë dorëheqje, sepse sipas tyre ka rrezikuar themelet e shtetit dhe se një veprim të tillë e ka ndërmarrë për t’iu shmangur arrestimit nga Gjykata Speciale.
Por Thaçi i mohoi akuzat duke thënë se ideja për shfuqizimin e Speciales nuk ka qenë e tij.
“Ka qenë dhe është një e keqe e domosdoshme. Iniciativa ka pasë edhe më herët, unë nuk mund të dal kundër asnjë iniciative të deputetëve. Nuk ka qenë iniciativa ime”, deklaroi Thaçi në mars të këtij viti.
Pas presionit ndërkombëtarë, deputetët nënshkrues për shfuqizimin e Speciales, shumica nga PDK hoqën dorë dhe kjo gjë nuk ndodhi.
Iniciativa për bërjen e Ushtrisë përmes ligjit…
Një iniciativë tjetër që ngjalli reagime të shumta si nga vendorët ashtu edhe nga ndërkombëtarët e ndërmarrë nga presidenti Thaçi, ishte shndërrimi i Forcës së Sigurisë së Kosovës në Ushtri përmes Kuvendit, pa pasur nevojë për ndryshime kushtetuese.
Por ndërkombëtarët edhe ndaj kësaj ideje reaguan fuqishëm, ku ambasadori amerikan, Greig Delawie, paralajmëroi autoritetet kosovare për pasoja nëse themelojnë ushtrinë nëpërmjet ligjit.
Në një intervistë për gazetën online Insajderi, Delawie deklaroi se SHBA kanë punuar gjatë që Kosova të ketë ushtri, por vetëm nëpërmjet ndryshimeve kushtetuese dhe në konsultim me të gjitha komunitetet në Kosovë.
Ai prerazi tha se Amerika nuk është kundër formimit të ushtrisë, por jo në mënyrën e propozuar nga Thaçi.
Dhe, duke parë kundërshtimin e fuqishëm të SHBA-së, Thaçi u zmbraps dhe përmes një letre njoftoi kryekuvendarin Kadri Veseli se është tërhequr nga iniciativa e bërjes së Ushtrisë përmes ligjit, ndërsa i kërkoi Kryesisë së Kuvendit që fare të mos e vendosin në rend dite këtë çështje.
Arsyetimi i presidentit ishte se ndërkombëtarët në krye me SHBA-në kanë konfirmuar gatishmërinë e tyre që të sigurojnë përkrahjen e komuniteteve, në veçanti komunitetit serb, që Ushtria të bëhet përmes ndryshimeve kushtetuese.
Ky proces, sipas Thaçit, do të përmbyllet me sukses të plotë brenda një periudhe të shkurtër kohore, pa saktësuar kur.
Iniciativa për shkëmbimin e territoreve…
Iniciativa e radhës që ka shkatuar zhurmë po aq sa dy të parat është kjo e fundit për korrigjimin e kufirit që vazhdon çdo ditë të ngjallë debate “pro et contra”, si nga vendorët ashtu edhe nga ndërkombëtarët.
Thaçi, përmes konferencave, javëve të fundit duke folur për korrigjim të kufirit me Serbinë ka treguar se si Kosova do e marrë Luginën e Preshevës e nuk do i japë gjë Serbisë, pra jo Veriun e Mitrovicës, siç dhe flitet.
Këtë ide e kanë quajtur të papranueshme disa shtete mike, ndërsa SHBA nuk është se ka dhënë një mendim të prerë, kurse kundërshtarët e Thaçit por dhe të tjerë vazhdojnë ta quajnë të rrezikshme.
Mbetet të shihet në javët e muajt në vazhdim nëse Thaçit do t’i dështojë edhe iniciativa për korrigjimin e kufirit me Serbinë, siç i dështuan bërja e Ushtrisë përmes ligjit dhe zhbërja e Speciales. /tesheshi.com/
