Nexhib Saviris, një miliarder egjiptian, ka propozuar të blejë një ishull në Mesdhe, pranë brigjeve greke apo italiane, për t’u bërë vend në të refugjatëve e për t’u kujdesur për ta.
I tronditur nga tragjeditë e njëpasnjëshme të të shpërngulurve nga vendet e tyre, miliarderi egjiptian e ka bërë fillimisht ofertën në rrjetin social Twitter, “Greqia apo Italia të më sheshin një ishull. Unë do të deklaroj pavarësinë e tij, do të pres emigrantët, e kam për t’u siguruar punë, duke ndërtuar vendin e tyre të ri.”
Propozimi i miliarderit nuk duket të jetë një shaka e momentit. I kontaktuar nga agjencia e lajmeve AFP, Nexhib Saviris e ka quajtur idenë plotësisht të realizueshme, e këmbëngul se është gati t’u bëjë propozime konkrete Romës dhe Athinës. “Ju keni dhjetëra ishuj që janë të shkretë dhe që mund të presin mijëra refugjatëve,” qenë fjalët e tij.
Do të ketë “strehë të përkohshme për të futur kokën njerëzit, e pastaj ju nisni t’i vini në punë ata për të ndërtuar shtëpi, shkolla, universitete, spitale,” ka vijuar të shpjegojë idenë miliarderi. “E nëse gjërat përmirësohen, kush dëshiron, le të kthehet (në vendin e tij).”
Saviris çmon se një ishull mund të kushtojë nga 10 në 100 milionë dollarë, por se duhet një investim shtesë për të ndërtuar infrastrukturën e duhur për t’u kujdesur për refugjatët.
Miliarderi egjiptian i kritikoi kushtet e ofruara nga Greqia dhe Italia për refugjatët, duke nënvizuar se ata do të trajtohen si “qenie njerëzore” në ishullin e blerë, e jo si bagëti, siç po ngjet tani.
Nexhib Saviris, me veprimtarinë afariste të shtrirë në fushën e telefonisë së lëvizshme, të hotelerisë, të medias, etj., është i njohur mes të tjerash për rolin e tij në grushtin e shtetit në Egjipt, dhe për financimin e pakursyer për rrëzimin e Muhamed Mursit. /tesheshi.com/
