Nga Ylli Pata
Partia Komuniste Kurde, apo PKK-ja e famëkeqe, ka një histori të gjatë dhe të lidhur në lidhjet me shërbimet sekrete shqiptare, por kryesisht në influencën që ky grupim ka patur me rusët dhe UDB-në jugosllave.
Një ish-oficer i sigurimit të atëhershëm, tregon për tesheshi.com se strukturat e egra terroriste të PKK-së influencuan të futen në operacione të kryqëzuara të sigurimit shqiptar jashtë vendit, kryesisht në diasporën shqiptare, por që nuk u pranuan kurrë nga autoritetet e Tiranës.
Ky refuzim i ka kushtuar rëndë spinazhit të kohës së komunizmit; dhe regjimi pati argument për të dyshuar se PKK-ja u përfshi e porositur nga UDB-ja jugosllave që të helmonte një diplomat të lartë shqiptar në Turqi, në fillim viteve `80.
Siç mësohet, gjatë viteve `60 të shekullit të shkuar, ndërkohë që stukturat sekrete shqiptare u lidhën dhe u angazhuan me stërvitjen e disa lëvizjeve çlirimtare në botë si ato të Kongos, por edhe Palestinezët e Al Fatahut të udhëhequra nga Jaser Arafati, Moska i kërkoi Tiranës që regjimi të armatoste edhe kurdët e PKK-së.
Siç mësohet, regjimi komunist e ka menduar gjatë. Ish-oficeri thekson se krerët e regjimit komunist kërkuan nga një diplomat shumë i rëndësishëm shqiptar që të kontaktonte me krerët e Ankarasë dhe, pas kontakteve u ra dakord që Tirana nuk do të përfshihej në asnjë mënyrë në këtë operacion.
Dhe realisht, prej asaj dite marrëdhëniet mes Turqisë dhe Shqipërisë kanë qenë mjaft të mira dhe pa asnjë incident.
“Nuk kishte asnjë problem nga Turqia për regjimin komunist; madje të gjitha nismat e Tiranës përkraheshin nga turqit në organizmat ndërkombëtare. Ka pasur edhe ndihma të fshehta, megjithëese ligji komunist nuk e lejonte”, thekson oficeri i cili përmend tërmetin e vitit 1967.
“Në Turqi shkonin shpesh grupe kulturore dhe sportive dhe kishte shkëmbim mjaft të mirë në disa fusha”, thekson ish-oficeri i shërbimit sekret, i cili e analizon këtë marrëdhënie jo vetëm me relacionet e përgjithshme por edhe me refuzimin kategorik për të trajnuar PKK-në.
Ai thekson se Abdullah Oçalan ka ardhur në Shqipëri me një grup të zgjeruar i përfshirë si pjesë e delegacionit të Al Fatahut palestinez, por është zbuluar dhe me mirësjellje i është kërkuar largimi.
Ndërkaq, zbuluesi shqiptar thekson se ka pasur një përplasje të vetë Enver Hoxhës me Jaser Arafatin për dy arsye: marrëdhëniet e tij të mira me Josif Broz Titon dhe përzierjen me PKK-në.
“Kishim të dhëna të sakta që njerëz të Al Fatahut, së bashku me PKK-në stërviteshin në Serbi dhe u infiltruan në këto struktura dhe shqiptarë të Kosovës që ishin pjesë e UDB-së”, thekson oficeri i cili shton se shqiptarët e infiltruar u dërguan në Turqi për t’u përzjerë me diasporën e masdhe shqiptare atje.
Ka qenë shërbimi turk që i dërgonte Sigurimit material të zgjeruar për të gjitha këto.
“Na i sillnin me bollëk, me foto me të dhëna me gjithçka. Ata u treguan miq të vërtetë. E lanë një mijë herë atë që krerët politikë bënë që të mos u përzjenim me njerëzit e PKK-së. Unë mund të them me plot gojën se vërtet që komunistët kurdë paguheshin nga Moska, bashkëpunonin me shërbimin serb, por kjo ka ndodhur pasi u prishëm përfundimisht me rusët. Madje strukturat e forta të KGB-së në Tiranë kanë punuar për të na prishur me turqit duke shpërndarë dezinformacion, por lidhja direkte që ne kishim, nuk e ndoti këtë bashkëpunim”, thekson ai.
Ndërkaq, për rastin e diplomatit të helmuar, ai refuzon të thotë detaje, por deklaron se ai ka qenë një referencë e fuqishme jo vetëm për diasporën që të mos influencohej nga lufta antikomuniste, por thelbi dhe puna kryesore e tij ishte për ngjizjen dhe ndihmën e filizave të rezistencës së Kosovës, e cila duhet thënë se ishte ideologjikisht pro enveriste.
Bërthama e Stambollit e kësaj lëvizje u bë shumë e fortë në fillimin e viteve ‘80, pikërisht në vitin 1981 kur shpërthyen demostratat e Prishtinës me kërkesën bazë “Kosova Republikë”.
Pikërisht, atëherë, thekson ish-oficeri, UDB-ja dha urdhër të asgjesohej diplomati shqiptar i cili falë edhe lidhjeve të rëndësishme si pjesë e një familje patriotike kishte bërë punë të madhe.
“Ne e morëm vesh menjëherë se gjithçka u bë nga kurdët me urdhër të UDB-së”, thekson ish-spiuni, i cili shton se mund të duket si absurde por realisht është e vërtetë që pas këtij incidenti CIA dhe shërbimet perëndimore ndaluan menjëherë aksionet kundër regjimit komunist.
Dhe ai argumenton se s’ka lidhje me ndonjë afeksion të SHBA ndaj regjimit komunist, por faktikisht në këtë kohë UDB-ja që kishte bashkëpunuar me amerikanët nis të veprojë me një strukturë të rëndësishme të KGB-së ruse. Dhe oficeri shton se pikërisht në ato vite, me ndërmjetësimin dhe të turqve, nisën kontaktet e para të amerikanëve me celulat e rezistencës kosovare; të cilat në fund të viteve 1990 kurorëzuan aleancën ndërmjet CIA-s dhe UÇK-së. /tesheshi.com/
