Presidenti i FIFA-s, Gianni Infantino, tha se shumica e federatave kombëtare të futbollit e mbështesin zgjerimin e Kupës Botërore në Katar në 2022 me 48 përfaqsuese.
Infantino tha se vendimi përfundimtar për këtë do të merret në mars, edhe pse ende nuk është e qartë nëse Botërori në fjalë do të ishte i vështirë për t’u organizuar vetëm në Katar.
Reuters shkruan se për shkak të bllokadës ndaj Katarit të imponuar nga vendet fqinje si Arabia Saudite, Bahreini dhe Emiratet e Bashkuara Arabe në qershor të vitit të kaluar, do të ishte e komplikuar të përfshihej dhe një vend tjetër.
Vitin e kaluar, FIFA votoi për të zgjeruar Botërorin nga 32 në 48 ekipe duke filluar nga viti 2026, por Infantino në disa raste ka shfaqur mundësinë që kjo të bëhet realitet që në vitin 2022.
“Deri më tani, shumica kanë shprehur pozitivisht pikëpamjet e tyre për këtë ide. Një rritje prej 16 ekipeve do të thotë se dhe 16 shtete të tjera do të ndjejnë ethet e Kupës Botërore, ndërsa 50 ose 60 vende do të mund të ëndërrojnë të shkojnë në këtë kompeticion të madh”, tha Infantino. /tesheshi.com/
