Dy fituesit në vite të këtij turneu, të quajtur zyrtarisht BNP Paribas Open, e që zhvillohet në Kaliforni të SHBA-ve, Djokovic dhe Nadal, do të sfidojnë njëri-tjetrin sonte në mbrëmje, në gjysmëfinale.
Përkatësisht numri një dhe numri pesë në botë, serbi dhe spanjolli vijojnë rivalitetin e tyre sportiv, ndërsa i pari ka qenë triumfues në përballjet e fundit mes tyre, edhe për shkak të problemeve të vazhdueshme fizike të Nadal-it.
Djokovic fitoi mbrëmë 2-0 në çerekfinale ndaj francezit Tsonga, por ai qe me fat kur ia doli t’i marrë të dy setet me tiebreak, 7-6, 7-6.
Ndryshe tij, Nadal e pati më të lehtë ndaj Nishikori-t. Pas një nisje të mirë të japonezit, që e vuri në vështirësi kundërshtarin, spanjolli mori frenat e lojës në dorë dhe fitoi 2-0, me setet e mbyllura 6-4, 6-3.
Në gjysmëfinalen tjetër të meshkujve do të ndeshen Goffin dhe Raonic, një belg kundër një kanadezi.
Te femrat, finalja është mes Serena Wiliams-it dhe Azarenka-s. Williams mposhti 2-0 në gjysmëfinale polaken Radwanska, ndërsa Azarenka triumfoi 2-1 ndaj çekes Pliskova. /tesheshi.com/
