Deputeti socialist Taulant Balla ka bërë me dije një ngjarje të ndodhur mbrëmjen e djeshme në aeroportin e Romës në Itali. Ai tregon përmes një postimi në rrjetin social Facebook se ishte duke u kthyer për në Shqipëri, ndërsa në aeroport është ndeshur me të bijën e ish kryeministrit Sali Berisha dhe bashkëshortin e saj.
Siç tregon Balla, dikush, i cili mendohet të jetë Jamarbër Malltezi, e goditi me grusht në krahun e majtë ndërsa bashkëshortja e tij, Argita hodhi një hamburger drejt tij.
Pas kësaj ngjarje, Balla ka njoftuar policinë në aeroportin e Romës si dhe ka bërë kallëzim penal në Shqipëri.
Ja çfarë shkruan të plotë deputeti socialist Taulant Balla në Facebook.
“Një gjë e pazakontë më ka ndodhur dje ne darkë në Aeroportin e Romës duke u kthyer nga një vizitë pune. Isha nisur nga Shqipëria në mëngjes herët dhe po kthehesha në të njëjtën ditë.
Isha duke kërkuar portën e daljes “Gate H 28”. Në njërën dorë kisha një çantë dhe në dorën tjetër xhaketën. Në momentin që kaloj pranë një kafeje Lavazza, nga krahu i majtë më vjen një goditje me grusht të një njeriu me kapele, ndërkohë që në krahë të djathtë shoh një grua me fustan te kuq që edhe ajo hodhi një hamburger drejte meje. Bëra një hap mbrapa se duart i kisha të zëna dhe aty njoha në fillim gruan që ishte Argita Berisha.
Nuk e kisha pare ndonjëherë nga afër, por ia njoh fytyrën. Ndërkohë që shquajta që personi me kapele mund të ishte burri i Argitës. I thashë vetëm: “jeni çmendur?” ndërkohë që të dy bërtisnin vetëm fjalën “qelbësirat”.
Dilemën e kisha të madhe, në fakt. Të liroja duart, apo të bëja atë që në fakt bëra. Shkova në stacionin më të afërt të policisë në aeroport dhe i njoftova. Në fakt policia italiane mu duk se e kishte parë ngjarjen në kamera, sepse njëri prej policëve më tha se dukej qartë se gruaja dhe burri i gruas të kishin zënë pritë. Një patrullë e policisë italiane ekzekutoi gjetjen e tyre dhe regjistrimin e gjeneraliteteve. Të njëjtin kallëzim e bëra edhe sapo zbrita në Rinas. Gjithçka është kështu dhe është fiksuar në kamerat e sigurisë së aeroportit. Të çmendur, për tu lidhur”. /tesheshi.com/
