Ministrja e Mbrojtjes Olta Xhaçka udhëtoi drejt Letonisë, aty ku u takua me kontigjentin ushtarak shqiptar të stacionuar në një bazë të NATO-s, për t’ju shprehur mbështetjen pas ngjarjes së rëndë ku humbi jetën nëntetare Zarife Hasanaj e u plagosën major Klodian Tanushi dhe rreshter Julian Kapaj.
“Dhimbja është e përbashkët dhe unë jam këtu me ju për të ndarë bashkë hidhërimin, por edhe për te gjetur forcën. Familjet e trë efektivëve, ju dhe familjet tuaja, do të keni mbështetjen time personale, por edhe të secilit prej 8 mijë efektivëve të familjes sonë të madhe ushtarake, për të kapërcyer këtë moment të vështirë. Ju nuk do të jeni kurrë vetëm dhe asnjëherë s’do të jenë vetëm familjet e çdo burri dhe gruaje në uniformë”, tha ministrja Xhaçka gjatë bashkëbisedimit me efektivët.
Sipas Ministrisë së Mbrojtjes, në takimin me Xhaçkën, drejtuesit ushtarakë kanadezë e letonezë të bazës, shprehën vlerësimet maksimale për përfaqësimin dinjitoz dhe profesionalizmin e efektivëve shqiptarë në këto dy vite të përfshirjes së tyre të misionit të NATO në Letoni. /tesheshi.com/
