Ministria e Jashtme ruse ka thirrur ambasadorin francez në Moskë, Jean-Maurice Ripert, për t’i shprehur vërejtjet për sjelljen e policisë franceze ndaj tifozëve rusë gjatë këtyre ditëve të Kampionatit Europian. Me theks të veçantë në ndalimin e tifozëve rusë që po udhëtonin nga Marseja drejt Lilës për të ndjekur një takim të aktivitetit.
Siç mësohet, diplomatit francez i është shprehur pakënaqësia për masat diskriminuese ndaj qytetarëve rusë.
“Ushqimi i mëtejshëm i ndjenjave antiruse mund ta përkeqësojë në mënyrë domethënëse atmosferën në marrëdhëniet ruso-franceze,” u deklarua nga dikasteri rus i punëve të jashtme.
Thirrja e ambasadorit francez u bë pak pasi ministri i Jashtëm i Rusisë, Sergei Lavrov, mbajti një fjalë në Dumën ruse.
Ai do të deklaronte se tifozët rusë ishin provokuar, duke e kritikuar gjithashtu mënyrën e trajtimit të tyre gjatë kontrolleve të sigurisë.
“Qe një incident absolutisht i papranueshëm kur një autobus me më shumë se 40 mbështetës rusë u ndalua dhe [policia] kërkoi që ata të dilnin nga autobusi për kontrolle të mjeteve të identifikimit dhe të dokumenteve.”
“Nuk mund të mbyllim sytë ndaj përpjekjeve për t’i injoruar veprimet provokuese të tifozëve të vendeve të tjera,” do të shtonte Lavrov.
Çështja e tifozëve rusë është në qendër të vëmendjes që prej nisjes së Kampionatit Europian. Për shkak të tyre, Rusia është kërcënuar me përjashtim nga veprimtaria, veç një gjobe që duhet të paguajë. /tesheshi.com/
