Vrasja e një të burgosuri në Vaqar dhe vdjekja e një tjetri në Shënkoll ka acaruar situatën në qeveri.
Nga burime brenda kabinetit mësohet se kryeministri Edi Rama i ka kërkuar ministrit të Drejtësisë, Ylli Manjani një raport të plotë dhe nxjerrje përgjegjësish për incidentet.
Ndërkohë sot kreu i burgjeve ka firmosur një sërë shkarkimesh, tre ditë pasi i dënuari Flamur Sula humbi jetën në rrethana të pasqaruara.
10 efektivë të Policisë së Burgjeve janë shkarkuar me urdhër të Drejtorit të Përgjithshëm të Burgjeve, Miklovan Kopani, i cili gjatë ditës zhvilloi për këtë çështje një takim me ministrin e Drejtësisë.
Po ashtu, është shkarkuar nga detyra edhe shefja e Sektorit të Çështjeve Sociale, ndërkohë që shefi i Policisë së Burgut Shënkoll u transferua në një burg tjetër.
20 punonjës të tjerë të këtij burgu morën masën e paralajmërimit për shkarkim nga detyra, masa këto që i paralajmëroi gjatë ditës edhe ministri i Drejtësisë, Ylli Manjani, i cili kërkoi procedim disiplinor ndaj punonjësve të këtij burgu.
Për shkak se djegia e të dënuarit Flamur Sulaj ndodhi nga një bombël e vogël gazi ndërkohë që në qeli secili nga të dënuarit kishte nga një të tillë, ministri i Drejtësisë kërkoi gjithashtu rishikim të rregullores që u lejon të dënuarve mbajtjen e sendeve të tilla. /tesheshi.com/
