Kryendeshja e javës së nëntë të Superligës, ajo mes Partizanit dhe Skënderbeut, ka përfunduar 0-0.
Në “Elbasan Arena”, nuk ka munguar asgjë veç golave, mbështetja e tifozëve, lufta sportive në fushë, kartonat e kuq, si dhe ndërprerja për pak minuta e ndeshjes.
Partizani nuk ia ka dalë të fitojë ndaj korçarëve, duke mos mundur kështu as të ngjitet në krye të klasifikimit.
Edhe pse kanë ushtruar presion, kryeqytetasit e kanë patur të pamundur ta dërgojnë topin në rrjetën e kundërshtarit.
Skuadrat e kanë mbyllur takimin me nga dhjetë lojtarë, pas daljes me të kuqe të Kalarit për Partizanin në minutën e 63-të, e të Vangjelit për Skënderbeun në minutën e 82-të.
Pikërisht me nisjen e dhjetëminutëshit të fundit të lojës kanë nisur dhe incidentet. Së pari kanë qenë forcat e sigurisë që janë përplasur me tifozët e Partizanit në shkallët e stadiumit. Për të vijuar me dy apo tre tifozë të dëmtuar, që kanë zbritur në fushë e kanë kërkuar ndihmë mjekësore, për çka ka mbërritur dhe autoambulanca.
E tëra kjo situatë e ka detyruar gjyqtarin ta ndërpresë lojën deri në normalizimin e situatës. Më pas janë luajtur normalisht minutat e mbetura.
Skënderbeu vazhdon ta kryesojë kampionatin, edhe pas këtij takimi, me 20 pikë, dy më shumë se Partizani i vendit të dytë. /tesheshi.com/
