Është arrestuar në Gjermani një nga emrat e shumtë nën akuzë për aferën e Inceneratorëve, në rastin konkret të Fierit.
Fjala është për Silvester Driza, i shpallur në kërkim nga SPAK si i përfshirë në çështjen e inceneratorit të Fierit.
30-vjeçari është arrestuar në Freiburg të Gjermanisë, pasi ishte shpallur në kërkim ndërkombëtar.
“Në vijim të bashkëpunimit mes Interpol Tiranës dhe homologëve, për lokalizimin, kapjen dhe ekstradimin e shtetasve të kërkuar nga SPAK-u, në kuadër të operacionit policor të koduar ‘Freiburg’, si rezultat i informacioneve të siguruara dhe shkëmbimit në kohë, nga Policia gjermane është kapur në Freiburg, Gjermani, dhe është arrestuar me qëllim ekstradimi drejt Shqipërisë, shtetasi i shpallur në kërkim ndërkombëtar S. D., 30 vjeç”, tha Policia e Shtetit.
Interpol Tirana, në bashkëpunim me Interpol Wiesbaden/Gjermani, vijon procedurat për ekstradimin e këtij shtetasi, drejt vendit tonë.
Gjykata e Posaçme kundër Korrupsionit dhe Krimit të Organizuar, Tiranë, i ka caktuar Drizës masën e sigurisë “Arrest në burg”, për veprën penale “Pastrimi i produkteve të veprës penale ose të veprimtarisë kriminale”.
Veç tij janë dhe emra të tjerë nën akuzë. Mbi ta qëndron Klodian Zoto, një nga emrat kryesorë të Inceneratorëe, nga i cili ka buruar cikli i abuzimeve. /tesheshi.com/
