Inceneratori i Tiranës te ky njeri: mesazhet e para të aministratorit të ri

Administratori shtetëror i Inceneratorit të Tiranës tha se disa bashki janë debitore prej tre muajsh ndaj shërbimit që kanë marrë për mbetjet.

Tashmë nën menaxhim nga shteti, pa Zoto e Mërtir nga pas, njeriu që drejton punën aty, Arjan Baçi, tha se puna vijon normalisht, përveç faktit se pagesat nuk janë kryer normalisht.

“Ka një vendim të GJKKO, që ka bërë sekuestron preventive të shoqërisë që menaxhon mbetjet në landfillin e Sharrës, Integrated Energy. Është vendosur që për menaxhimin e kësaj shoqërie të merret agjencia e menaxhimit të pasurive të konfiskuara dhe administrator jam përzgjedhur unë. Kam dalë për të thënë që puna po vazhdon normalisht, po shikohen detyrimet e prapambetura që kompanitë ka te kjo shoqëri, që të bëhet i mundur vazhdimi i ecurisë, për trajnimin e mbeturinave në qarkun e Tiranës, Bashkitë janë debitorë, pasi për tre muaj nuk kanë shlyer detyrimet, kemi filluar kontaktimin që të zbatojnë kontratën. Mes tyre edhe Bashkia e Tiranës, e Vorës, e Kavajës”, bëri me dije ai.

Ai tha se nëse këto Bashki nuk do të paguajnë paratë dhe do të refuzojnë që të respektojnë kontratën, rrezikohet të krijohet një kaos në menaxhimin e mbeturinave.

“Ka një kontratë që duhet të zbatohet, moszbatimi do të sillte një kaos në menaxhimin e mbetjeve urbane të qarkut të Tiranës”, shtoi administratori shtetëror.

Sa i përket Klodian Zotos dhe Mirel Mërtirit, të shpallur në kërkim, Arjan Baçi sqaroi se ato nuk kanë më asnjë të drejtë në menaxhimin e kompanisë. /tesheshi.com/