Mazhoranca i kërkon opozitës që mos nxitohet në konkluzione rreth hetimit mbi inceneratorët.
Siç po shihet këto ditë, anëtarë të PD-së në komisionin hetimor parlamentar mbi inceneratorët, po denoncojnë, sipas tyre, atë që po konstatojnë: aferën korruptive të tyre.
Ndër më aktivet është Jorida Tabaku, e cila shkruan së fundi: “Shkeljet e evidentuara në komision janë jashtëzakonisht të rënda. Sot bëhet fjalë jo vetëm për një procedurë korruptive në konceptim të saj, por sot bëhet fjalë për një skemë të pastrimit të parave dhe të pagesave që kanë shkuar në duart e zyrtarëve shtetërore”.
Por kolegu i saj nga mazhoranca, Arben Pëllumbi, nuk është dakort me këtë qasje.
“Edhe pse kemi theksuar që komisioni duhet të përfundojë punën dhe të dalë me raport, ne anëtarët e komisionit hetimor duhet të jemi të kujdesshëm dhe të mos dalim në përfundime të parakohshme dhe të mos japim pretenca”, tha ai.
“Emergjenca mjedisore që kishim në këto zona nuk ekziston më. Për çdo gjë tjetër që ka çështje penale janë investuar institucione përkatëse. Ne si deputet duhet t’i qëndrojmë strikt detyrës që na është përcaktuar dhe mos bëjmë deklarata dhe konkluzione të parakohshme”, theksoi zyrtari socialist.
Sipas Pëllumbit, “inceneratori i Fierit është në procesin e kolaudimit, ndërsa Tirana ka shpëtuar nga një gangrenë jo vetëm për Kombinatin por për të gjithë Tiranën”. /tesheshi.com/
