Emmanuel Macron bën sot betimin si presidenti i ri i Francës. Në pallatin presidencial Elize po zhvillohet ceremonia me këtë rast, ku François Hollande i dorëzon atij detyrën.
Macron, vetëm 39 vjeç, bëhet presidenti francez më i ri në moshë, duke zëvendësuar në postin presidencial një shtetar jopopullor si Hollande, i cili madje nuk u përpoq as të rikandidonte në zgjedhje.
Një takim privat me presidentin në ikje, një ceremoni inaugurimi, si dhe një fjalim; këtë rrjedhë do të ketë kalimi i pushtetit nga Hollande te Macron.
Presidenti i ri francez do të bëjë të njohur të hënën emrin e kryeministrit të ardhshëm, për të fluturuar më pas drejt Berlinit, ku do të takohet me kancelaren Merkel.
Vetëm një javë më parë, Macron fitonte bindshëm në balotazh ndaj Marine Le Pen-it. Një fitore që i dha fund ankthit disamujor në Francë e jashtë saj, në Europë. /tesheshi.com/
