Nga Blendi Gashi
Ndërsa në nivelin qendror LDK dhe VV mundohen të lidhin koalicion bashkëqeverisës, në Komunën e Prishtinës janë aq armiq të mëdhenj saqë nuk pajtohen pothuajse për asgjë.
Kështu ndodhi edhe në seancën e sotme ku për inate personale asambleistët e këtyre partive u përplasën mes vete duke mos u pajtuar që të ndajnë tokën për vendin ku duhet të ndërtohet Ambasada e Shqipërisë dhe me shumicë votash u vendos që kjo pikë të hiqet nga rendi i ditës.
Kërkesën për shtyrje e bëri shefi i grupit të asamblistëve të LDK-së, Agim Gashi, i cili tha se nuk janë kundër që Ambasadës së Shqipërisë t`i ndahet parcela, mirëpo ai shtoi se janë që të respektohet ligji në plotni.
“U krijua përshtypja se ne jemi kundër, nuk jemi kundër, por jemi që të respektohet ligji”, tha Gashi, i cili kërkoi që për vendimin e ndarjes së parcelës të kërkohet interpretim ligjor nga Ministria e Pushtetit Lokal dhe pastaj të vazhdohet tutje.
Ndaj Gashit reagoi kryetari i Komunës Shpend Ahmeti, i cili tha se nuk kanë nevojë të pyesin Ministrinë.
“Nuk ka nevojë me pyet Ministrinë e Pushtetin Lokal për tokën e cila është dhënë në shfrytëzim për ndërtimin e ambasadës së Shqipërisë”, ka deklaruar Ahmeti.
Kurse Mirlinda Sopa, asambliste e AKR-së tha se “është turp që Kuvendi Komunal nuk i bën zgjidhje Ambasadës së Shqipërisë”.
Ndaj heqjes së kësaj pike nga rendi i ditës ka reaguar Adonis Tahiri, zyrtar për media nga Vetëvendosje në Komunën e Prishtinës i cili ka akuzuar LDK-në dhe PDK-në se po stopojnë dhënien e tokës për Ambasadën shqitpare.
“Ambasada e Republikës së Shqipërise, halë në sy për LDK-në dhe PDK-në në Komunën e Prishtinës. Lidhur me tokën që duhet t’ia ndajmë kësaj ambasade, lloj lloj përralle u dëgjua sot në Kuvend Komunal. E, meqë shumicën në këtë Kuvend e përbëjnë mjeranat, kjo pikë u hoq nga rendi i ditës”, ka shkruar Tahiri në Facebook.
Portali ynë ka kontaktuar edhe Ambasadën e Shqipërisë për të marrë një përgjigje, por përmes telefonit na është thënë se ambasadori Qemal Minxhozi nuk gjendet në Prishtinë dhe vetëm ai mund të japë një përgjigje zyrtare për këtë çështje.
Kujtojmë se në maj të vitit të kaluar, Shpend Ahmeti pak ditë para mbledhjes së dy qeverive shqiptare (Kosovës dhe Shqipërisë), kishte thirr seancë të jashtëzakonshme për dhënien në shfrytëzim te parcelës për Ambasadën e Shqipërisë, thirrje së cilës nuk i ishin përgjigjur partitë opozitare LDK e PDK, duke bërë që seanca të dështoj në mungesë kuorumi. /tesheshi.com/
