Pavarësisht se partitë opozitare kanë thënë se nuk do të jenë pjesë e një komisioni që do të vlerëonte territorin e shtetit, pa u shkarkuar komisioni “Meha”, kryeministri Isa Mustafa, edhe sot ka deklaruar se do të ftojë ekspertët e opozitës dhe shoqërisë civile të jenë pjesë e komisionit në fjalë, në mënyrë që të bëhet matja dhe të shihet se a ka humbur apo jo Kosova territor me Malin e Zi.
“Unë do tu dërgojë ftesa tani. Në të vërtetë kërkesa të gjithëve dhe partive opozitare dhe shoqërisë civile që ata të caktojnë ekspertët e tyre, të bahet matja. Nuk dua ta pengoj askënd. Sepse të gjithë ne dëshirojmë dhe unë dëshiroj si kryeministër i vendit, që të kem një ekzaminim të ekspertëve dhe të thonë se sa është sipërfaqja e Republikës së Kosovës. Duke marrë parasysh kufijtë ekzistues që i kemi tani. Sepse ata po thonë se nuk i keni përfunduar kufijtë me Serbinë. Kufiri me Shqipërinë është ai që ka qenë përpara ndërmjet Jugosllavisë dhe Shqipërisë, që është kufi i Kosovës me Shqipërinë. Me Serbinë i kemi kufijtë që i ka pasur krahina përpara. Andej po e masim dhe po shohim se në këtë kufi që është caktuar me Malin e Zi, a është ruajt territori i Kosovës apo është humb territor”, ka thënë Mustafa.
Kreu i qeverisë ka shtuar se matja e territorit nuk duhet t’i pengoj askujt sepse vetëm në nëkëtë mënyrë sipas tij do të informohen drejt qytetarët.
“S’duhet akujt t’i pengojë. Në qoftë se vijmë në konstatim se është territori, atëherë mbetet vetëm çështje e tekeve politike. Por nuk kemi arsye ta pengojmë procesin e liberalizimit të vizave. Unë mund të iu them juve, se nuk është vetëm çështje e liberalizimit por është çështje e përkufizimit të sovranitetit të republikës së Kosovës”, ka deklaruar Mustafa. /tesheshi.com/
