Nga Bardha Nergjoni
Edhe xhamia e re e Cërrikut konsiderohet një objekt fetar i ndërtuar “jashtë juridiksionit” të Komitetit Mysliman Shqiptar, një status i ri ky për xhamitë që i shenjon ato si “rebele”. Por kjo, në terma fetare nuk është diçka “blasfemike” që prodhn radikalizëm apo esktremizëm, mjaft që të jesh në rregull me ligjet e shtetit dhe normat komunitare. “Jashtë juridiksionit” nuk do të thotë jashtë kontrollit; nuk do të thotë shpërfillje e institucionit qendror, KMSH-së; nuk përbën ndonjë rebelim a ndryshim kursi në promovimin e mënyrës së ushtrimit të besimit.
Ky shpjegim vjen nga imami dhe besimtarët e kësaj xhamie të re, shumë impozante për një qytezë “gri” si Cërriku. Ata të thonë se veprojnë në mënyrë të pavarur ng KMSH-ja në kuptimin menaxherial të fjalës, porse kanë bashkëpunim të rregull me të.
Xhamia e re është një objekt me dy kate, dy minare dhe shumë kupola. Pranë saj ndodhet edhe një qendër që do të funksionojë çerdhe dhe kopësht për familjet në nevojë.
Sipas imamit të zgjedhur të xhamisë, Kreshnik Çili, xhamia është ndërtuar me kontributin e të gjithë besimtarëve dhe me firmat e 500 praktikantëve të dorëzuara në bashkinë e qytetit.
Dhe, duke sqaruar të vërtetën e shpalljes “jashtë juridiksionit” të kësaj xhamie, imam Çili të shpjegon se një vit më parë është bërë një takim me krerët e KMSH-së dhe iu është kërkuar bashkëpunim. Ai ka pranuar se kjo xhami nuk do të dalë jashtë rregullave, por që do menaxhohet në mënyrë të pavarur, ngjashëm si shoqata të tjera kulturore-fetare. “Ne nuk jemi radikalë. Respektojmë rregullat dhe ligjet. Sa i përket etiketimit tonë mund t’ju sjell një shembull. Në Shkodër janë ndërtuar mbi 75 xhami dhe vetëm 25% janë nën juridiksionin e KMSH-së.
Kjo do të thotë se në Shqipëri ka shoqata që ecin përpara në shërbim të komunitetit të besimtarëve e që punojnë në mënyrë të pavarur”, pra duke ndërtuar dhe xhami “jashtë juridiksionit”.
“Midis KMSH-së dhe këtyre shoqatave ka një bashkëpunim dhe marrëdhënie krejtësisht normale, dhe ne jemi si në rastin e tyre pra, që e kemi ndërtuar xhaminë me kontributin e besimtarëve, ta pavarur nga buxheti i KMSH-së, por duke qenë pranë saj si formë bashkëpunimi me raporte krejt normale”, shton Çili.
Sipas tij, kjo në Cërrik, më shumë se sa një xhami është një qendër e vërtetë kulturore me shumë shërbime. “Kjo është një qendër kulturore që ka dhe xhaminë brenda saj, po kështu kopësht, çerdhe dhe një sallë ku mund të bëhen takime apo aktivitete. Fillimisht po praktikohet vetëm falja e namazit pasi objekti ende nuk ka përfunduar. Për financimin u kemi bërë thirrje besimtarëve, të cilët kanë kontribuar me çfarë kanë mundur dhe vijojnë të kontribuojnë. Kemi pasur dashamirës që na kanë ndihmuar dhe gjej rastin të falenderoj gjitha firmat që kanë pranuar të na japin materiale, edhe pse nuk i kemi pasur paratë. Jemi në borxh të madh ndaj tyre. Ne jemi konform rregullave që i pranon Islami. Nuk dalim jashtë rregullores së shtetit shqiptar”.
Ndërkohë, sa i përket sulmeve terroriste në Paris, imami thotë se Islami lufton dhunën dhe padrejtësinë kudo që ndodh. “Nuk është fjala ime, është Kurani, fjala e Zotit, që dënon dhunën, mostolerancën, mosmëshirën. Islami u njeh të drejtën besimtarëve të feve me burim hyjnor që të praktikojnë besimin e tyre pa u cënuar aspak. Në Islam, pra në atë kohë dhe në atë botë të cilën e kanë udhëhequr myslimanët, ka patur një bashkëjetesë model me banorët e tjerë me besim ndryshe, që Kur`ani i njeh si ‘popuj të Librit’. Pra myslimanët kanë jetuar paqësisht me të tjerët, me të krishterët dhe jehudët, pasi e kanë këtë referencë kur`anore. Islami është kundër terrorit dhe padrejtësive kudo që ndodh qoftë në Francë, në Amerikë, Kinë, Siri, Suedi, Afganistan, kudo.”
Imam Çili thotë se zgjodhja e kësaj situate, sa globale aq dhe lokale, ku veç akteve kriminale të terrorit mbi të pafajshëm, ka më pas dhe një terror paragjykues dhe fshikullues ndaj komuniteteve të tëra të besimtarëve pa asnjë faj apo përgjegjësi, vjen pikërisht nga fryma që përçojnë bazat e Islamit. “Na duhet ngritja mbi bazat e mirëkuptimit e tolerancës, mbi format më të mira të sjelljes duke respektuar të drejtat që i takojnë çdokujt. Dhe kjo nis që nga mosetiketimi me Islam për atë që bën një vepër të keqe. Duhet të jemi të matur e korrekt, pa i bërë padrejtësi njëri-tjetrit”.
Komuniteti i besimtarëve të Cërrikut kërkojnë që të vazhdojnë aktivitetin e tyre normal në xhami, pasi thonë se prej tyre, përkushtimit të tyre fetar, shoqëria vetëm të mira mund të përfitojë.
E sa i përket rrezikut të përfolur që Shqipëria të goditet nga sulmet terroriste, ata shprehen se janë thjesht manovra që kërkojnë të përhapin panic, pasi deri tani nuk është regjistruar qoftë edhe një incident në këtë frymë prej atyre që bëjnë vepra të këqia dhe që shpesh maskohen me Islamin. /tesheshi.com/
