Një ditë pasi deputetja Mesila Doda mbajti në parlament një fjalim të fortë apelues për çdo koleg deputet që të mos e votojë atë nen të ndryshimeve kushtetuese që u hap rrugë martesave gej, imami i njohur i xhamisë së “Rrugës së Kavajës”, Ahmet Kalaja, e ka quajtur znj. Doda një burrneshë që duhet mbështetur në thirrjen e saj.
“Ndihemi mirë që në parlament qenka një burrneshë, një besimtare katolike, e cila mbajti një fjalim dinjitoz, e që ka gjithë mbështetjen tonë”, tha z. Kalaja në hutben e së premtes.
Edhe ai nga ana e tij, u ka lëshuar një thirrje të gjithë deputetëve të parlamentit shqiptar, siç tha, “atyre që vetes i thonë muslimanë e të krishterë, qofshin katolikë, ortodokse apo protestantë”, që mos e votojnë atë nen.
“Përndryshe, do i ndjekë mallkimi i njerëzve. E mundet që Zoti t’i ndëshkojë që sa të jenë në këtë jetë, ta provojnë tek fëmijët e tyre atë që sot po e lejojnë me votën në duart e tyre”.
Por tha ai, “dëshiroj të mendoj që kjo nuk do të ndodhë, derisa nuk ka dhe asnjë lidhje me reformën e fortdëshiruar në drejtësi”.
“Nëse ndodh, ne nuk duam më që të urohemi për Bajram a Pashkë nga ata që do ligjërojnë martesat gej. Kjo nuk ka kuptim”, tha imam Ahmet Kalaja.
Ai më tej iu drejtua të gjithë atyre zërave, që siç tha, “na thonë se pse e keni kapur kaq keq me ata”.
“Ne u themi se nëse ndodh që të ligjërohen martesat gej, nesër këta do kërkojnë që kjo lloj martese të futet dhe kurrikulat mësimore. Pra, që fëmijët tanë të mësojnë se si martohet burri me burrë e gruaja me grua”, shtoi hoxha i njohur. /tesheshi.com/
