Kryeministri Rama tha se beson që një ditë Kosova do jetë në Ballkanin e Hapur.
“Të gjithë e dinë që unë jam 100 për qind në anën e qeverisë së Kosovës për sa i përket njohjes. Megjithatë, nuk është sekret se unë kam një mendim ndryshe nga qeveria e Kosovës kur është fjala për dialogun me Serbinë dhe qasjen në Ballkanin e Hapur. Unë besoj se Kosova duhet të marrë pjesë në Ballkanin e Hapur dhe të dalin të festojnë me presidentin Vuçiç. Ai thotë se të gjithë mund të ulen në atë tavolinë”, tha Rama në një intervistë për median serbe.
Ai shtoi se e imagjinonte këtë moment, ndonëse guximshëm.
“Unë kam aftësinë të imagjinoj gjëra që të tjerët nuk do t’i mendonin kurrë. Nuk është çmenduri, nuk është marrëzi, por guxim, ambicie dhe besim. Unë besoj në të, dua me ambiciozitet të ndërtoj paqen me të tjerët dhe kam guximin ta them. Dhe sigurisht që mund ta imagjinoj këtë. Unë mendoj se kjo do të ndodhë. Sigurisht, me koston e kohës së humbur. Kosova një ditë do të jetë në Ballkanin e Hapur. Nuk ka dyshim për këtë, sepse është e ardhmja. Ose do të jemi këtu, së bashku, duke festuar produktet e popujve tanë, duke i ndihmuar ata të prodhojnë dhe tregtojnë më shumë, ose do të nxisim konfliktet, gjakun dhe gjithçka tjetër”, arsyetoi kreu i qeverisë shqiptare.
Sa për tensionet e fundit mes Kosovës dhe Serbisë, ato me shkak reprocitetin e diktuar nga Prishtina në kufi, i cili u shmangën me anë të një marrëveshjeje, Rama se zgjdhjen e ka në Open Balkan.
“Unë respektoj sovranitetin e tyre në vendosjen se si t’i qasen kësaj çështjeje.
Jam plotësisht i bindur se Ballkani i Hapur është një mundësi e shkëlqyer për të gjithë, përfshirë ata, dhe duke përfshirë dialogun ndërmjet Serbisë dhe Kosovës. Sepse, në fund të fundit, të gjithë jemi njerëz dhe ngjajmë shumë më tepër nga sa mendojmë, kur shikojmë njëri-tjetrin nga larg ose kur shikojmë njëri-tjetrin nga prizmi i historisë, ngjarjeve të kaluara dhe të dhimbshme”, tha Rama.
Ai veçoi dhe një episod me Vuçiçn në 2014-ën, gjatë një vizite në Beograd, kur deklaroi se Serbia duhet ta njohë Kosovën.
“Aleksandri ishte i pakënaqur, thënë më butë, me deklaratën time para gazetarëve në Pallatin e Serbisë, kur thashë se Serbia duhet ta njohë Kosovën. Ai ishte i tërbuar. Më kujtohet mirë, kur mbaroi konferenca për shtyp, patëm pak pije freskuese para drekës. Si ishte i rrethuar nga ekipi i tij. Duke qenë shumë më i gjatë se ata, dukej si një kullë e rrethuar me mure. Unë iu afrova me një shishe, dhe ai më tha: ‘Më thuaj pse nuk të kam dëbuar akoma nga Serbia?’.
Unë i thashë: ‘Nuk jam i çuditur, sepse për këtë je president, e ata jo, janë thjesht këshilltarët e tu’. Pastaj në mbrëmje erdhëm këtu, shëtisëm dhe përsëri ishte shumë i tensionuar. Megjithatë, në fund ramë dakord që nëse do të vazhdonim të debatonim dhe të përpiqeshim të heshtnim njëri-tjetrin, nuk do të ishte e mundur të ndërtonim asnjë lloj marrëdhënieje. Më tha: Dhe çfarë do të ndodhte sikur të vija në Shqipëri dhe të deklaroja ‘Nuk do ta njohim Kosovën?’. Unë iu përgjigja: ‘Mund të thuash çfarë të duash në Shqipëri, unë nuk do të sillem siç u solle ti këtu’. Por, edhe një herë, kjo nuk është arsye për të mos vazhduar të flasim. Mendoj se ka një kapacitet shumë më të madh për të kuptuar njëri-tjetrin dhe ky është një parakusht për ndërtimin e paqes”, tha ndër të tjera Rama gjatë intervistës. /tesheshi.com/
