Mesfushori i Borusias së Dortmundit mund të jetë blerja e parë e Mançester Sitit të Pep Guardiola-s. Marrëveshja pritet të nënshkruhet këtë javë, dhe është në shifrën e 26 milionë eurove.
Kontaktet kanë filluar prej muajsh, ndërsa anglezët janë treguar më të shpejtë se përfaqësuesit e skuadrave të tjera të interesuara për shërbimet e lojtarit të kombëtares gjermane, por që është me prejardhje turke. Gündoğan qe parë në mars të këtij viti duke u takuar me drejtorin sportiv të Mançester Sitit, Txiki Begiristain-in.
Ka patur dyshime ndërkohë për transferimin e lojtarit, pasi ai sapo ka kryer një operacion në gju dhe do të qëndrojë jashtë fushave për më paku katër muaj. Por mësohet se ka qenë vetë Guardiola që ka kërkuar firmosjen e marrëveshjes me Gündoğan-in.
Futbollisti luan që nga viti 2011 për Borusian e Dortmundit. I spikatur për aftësitë e tij, ai ka tërhequr vëmendjen e shumë skuadrave. Gündoğan ka kaluar një sezon me një sërë dëmtimesh. Mesfushori është aktivizuar në 40 ndeshje gjatë këtij sezoni me Borusian dhe ka shënuar tre gola.
Dëmtimi i fundit ia ka bërë atij të pamundur pjesëmarrjen në Euro 2016, duke humbur njëkohësisht dhe fazën përgatitore për sezonin e ri.
Si një mesfushor me tipare mbrojtëse, pavarësisht dëmtimeve, ai pritet të sjellë më tepër ekuilibër në mesfushën e Mançester Sitit. /tesheshi.com/
