Kryetari i Kuvendit të Shqipërisë, Ilir Meta, i shoqëruar nga ambasadori i Shqipërisë në Kosovë, Qemal Minxhozi dhe nga autoritetet më të larta lokale vizitoi Krushën e Madhe për të përkujtuar banorët e vrarë gjatë masakrës së kryer 17 vjet më parë, nga forcat serbe në këtë fshat.
Meta, vizitoi shkollën e mesme të fshatit “Ukshin Hoti”, ku drejtuesit dhe mësuesit e kësaj shkolle informuan kryeparlamentarin e Shqipërisë lidhur me kushtet e mësimdhënies si dhe me zhvillimin e mëtejshëm të sistemit arsimor.
Duke vlerësuar figurën e patriotit Ukshin Hoti, Meta theksoi rëndësinë e arsimit për një shoqëri më të hapur dhe më të zhvilluar.
“Shpreh kënaqësinë e veçantë edhe nderin që të jem në Krushë dhe në këtë shkollë që mban një emër shumë të madh, jo vetëm për popullin e Krushës e të Kosovës, por edhe për gjithë shqiptarët kudo ku janë, emrin e profesorit, veprimtarit dhe patriotit të jashtëzakonshëm, Ukshin Hoti. Jam këtu në prag të përvjetorit të masakrës së Krushës, sepse dihet që Krusha ishte ndoshta e para që vuajti hakmarrjen e okupatorit pas fillimit të bombardimeve nga ana e NATO-s më 24 mars. Një hakmarrje që e pësuan edhe fëmijët e Krushës, përveçse edhe vetë Ukshin Hoti”, tha Meta. /tesheshi.com/
