Në një intervistë për Zërin e Amerikës, kreu i Kuvendit shqiptar, Ilir Meta, ka folur për disa çështje të mprehta të realitetit shqiptar, mes tyre dhe për atë më të rëndësishmen, ekonominë.
“Nuk duhet të harrojmë që kjo qeveri e mori në një situatë të vështirë ekonominë. Nuk është përgjegjëse kjo qeveri për krizën greke, nuk është përgjegjëse kjo qeveri që Italia, që është partneri ynë kryesor nuk ka një situatë të shkëlqyer. Ka shumë faktorë dhe presion të jashtëm”, tha Meta duke iu referuar më pas një shembulli në rajon, Maqedonisë.
“Duhet më shumë punë për ringritjen e ekonomisë dhe reformat e ndërmarra nga qeveria këtë synim kanë. Duhet të bëjmë shumë më tepër për rritjen ekonomike të vendit dhe të mësojmë nga ndonjë vend fqinj, siç është rasti i Maqedonisë, ku janë tërhequr investimet e huaja mjaft serioze. Ne në këtë kohë të përgjithshme që karakterizohet nga mungesë fondesh, duhet të arrijmë ta rrisim ekonominë tonë në potencialet e saj të zhvillimit”, tha kryeparlamentari shqiptar.
Ai u pyet dhe për akuzat ndaj tij për çështjen ÇEZ-DIA, ku hodhi poshtë aludimet e BIRN-it se pas kësaj afere fshihet emri i tij.
“Ju niseni nga një shkrim i manipuluar i BIRN dhe harroni reagimin që thotë se nuk përmendet emri im. Sigurisht është emri i një ish-kryeministri dhe kjo është bërë publike tashmë, por unë nuk dua të përmend emra”, sqaroi Meta.
Kryeparlamentari shqiptar ndodhet këto ditë për një vizite zyrtare në SHBA. /tesheshi.com/
